‘दुई कदम’बाट डेब्य गर्न पाउँदा दंग छन् इओन

मंसिरको २९ गतेबाट रिलिजमा आउन लागेको फिल्म ‘दुई कदम’बाट नेपाली फिल्म क्षेत्रमा कलाकारको रुपमा इओन लिम्बुले डेब्यू गर्दैछन् । यो फिल्मको प्रचारप्रसारमा दौडधुप गरिरहेका इओन उत्साहित पनि छन् ।

अस्कर इन्टरनेशनल कलेजमा ‘ब्याचलर इन सिनेमा स्टडिज’मा अन्तिम बर्षमा अध्ययन गरिरहेका इओनले फिल्मको पर्दामा देखिए जस्तो क्यामेराको अगाडि अभिनय गर्न सहज नभएको बताए । उनले भने–‘म भित्र यतिबेला डर, उत्साह, खुशी सबै एकैपटक छ । बाल्यकालदेखिको सपना पुरा गर्न पाएकोमा उत्साहित पनि छु ।’

उदय सुब्बाले यो फिल्मको निर्देशन गरेका हुन् । पुराना फिल्म निर्देशक सुब्बाले यो फिल्मलाई लभ स्टोरी कथामा राम्रो बनाएको बताए । यो फिल्ममा इओन चुलबुले यूवाको भूमिकामा देखिदैछन् । 

इओनले आफूले अपेक्षा गरेको भन्दा पनि राम्रो ‘दुई कदम’ बनेको बताए । उनले आफ्नो सोच नै फिल्म क्षेत्रमा करिअर बनाउने रहेको बताए । यो फिल्ममा इओनका अलवा सिमोन गिरी, सुनिल थापा, कविता आले, सुरविर पण्डित, प्रेम सुब्बा, गौरव पहाडी, बुद्दि तामाङ, अर्जुन गुरुङ लगायतका कलाकारको मुख्य भूमिका छ । अजम्बरी फिल्मस्को व्यानरमा निर्माण भएको यो फिल्ममा तारादेवी लिम्बुको लगानी छ ।

दयाराम घिमिरेको कथा, पटकथा तथा लेखन रहेको फिल्ममा विक्रम डीसीको छायांकन, ताराप्रकाश लिम्बु र विकास चौधरीको संगीत, डीपी खनालको गीत, राजु किराँतीको एक्सन, रामजी लामिछानेको कोरियोग्राफी, प्रविन ढकालको सम्पादन छ ।