रिलिजको चौथो दिन पनि ‘दिमाग खराब’को बिष्फोटक व्यापार कायमै

कार्तिकको २४ गतेबाट देशभरका हलमा रिलिजमा आएको फिल्म ‘दिमाग खराब’ले बम्पर व्यापार गरिरहेको छ । रिलिजको पहिलो दिन फिल्मको व्यापार औषत थियो । तर, शनिबारबाट भने यसको व्यापार आक्रामक देखिएको छ । 

आज रिलिजको चौथो दिन हो । बलियो वर्ड अफ माउथका कारण यो फिल्मको व्यापार आज बिष्फोटक देखिएको छ । अधिकांश हलमा दर्शकको अकुपेन्सी ९५ देखि शत प्रतिशत देखिएको छ । फिल्मको बिषयमा दर्शकको प्रतिक्रिया सुखद भएपछि व्यापार पनि बढेको हो । तिहार बिदाको फाइदा फिल्मले पर्याप्त मात्रामा उठाइरहेको छ । 

बलिउड फिल्म ‘टाइगर ३’को मिश्रित प्रतिक्रिया आएका कारण पनि तिहार बिदापछि यो फिल्मको व्यापारमा खासै गिरावट नआउने प्रक्षेपण गर्न सकिन्छ । 

निश्चल बस्नेतको निर्देशनमा तयार भएको यो फिल्ममा खगेन्द्र लामिछाने, दयाहाङ राई, अर्पण थापा, स्वस्तिमा खड्का, बिजय बराल, सुमन कार्की लगायतका कलाकारको अभिनय छ । 

फिल्मले सुखद व्यापार गरेपछि निर्माणपक्षले खुशी व्यक्त गरिरहेको छ । विशेषगरि, राजनीतिक दलबाट वाक्क भएका जनताले नयाँ उम्मेदवारमाथि देखाएको आशालाई फिल्मले गज्जब तरिकाले प्रस्तुत गरेको छ ।