‘पर्खी बसेँ तिमीलाई’को ‘कालो चश्मा लाउ हैं’ बोलको गीत रिलिज

कुनै समयको लोकप्रिय गीत ‘कालो चश्मा लाउ है मैया’लाई रीमेक गरिएको छ । निर्देशक दीपक श्रेष्ठले निर्देशन गरेको नयाँ फिल्म ‘पर्खी बसेँ तिमीलाई’मा यो गीत रीमेक गरिएको हो । यो गीत आज सार्वजनिक गर्दै फिल्म पौषको २७ गतेबाट रिलिज हुन लागेको जानकारी दिइएको छ ।

फिल्मको बारेमा निर्देशक श्रेष्ठले भने–‘यो विशुद्ध प्रेम कथानक फिल्म हो । यसैले, गीतमार्फत नै हामीले प्रचारको सुरुवात गरेका हौं । पर्खी बसेँमा जस्तै यसमा पनि नयाँ कलाकार लिएर काम गरेको छु । फिल्म उद्योगमा नयाँ कलाकारलाई स्विकार गरिने कुरामा विश्वस्त छु ।’ यो फिल्मबाट कलाकारको रुपमा किरण श्रेष्ठ र रक्षा बुढाथोकीले डेब्यू गरेका छन् । 

फिल्म ‘बादलपारी’मा समावेश ‘काले चश्मा’ बोलको गीतको रीमेक भर्सनमा गायक प्रमोद खरेल र गायिका मिलन नेवारको स्वर छ । रीमेकमा पनि सुरेन्द्र राणाकै शब्द र शम्भुजित बास्कोटाको संगीत छ । 

पाटन र भक्तपुर दरबार स्क्वायरमा छायांकन गरिएको गीतको भिडियोमा निशा रसाइलीको नृत्य निर्देशन छ । रोमान्स फिल्म्स र तपश्री फिल्म्स् (सिक्किम) को संयुक्त व्यानरमा निर्माण गरिएको फिल्ममा अनिशा रसाइली, शिव श्रेष्ठ लगायतका कलाकारले अभिनय गरेका छन् ।

यसमा राजाराम बुढाथोकीको निर्माण, कोमल गुरुङको सह निर्माण, परिच्छेद सेन, मौनता श्रेष्ठ र पुरुषोत्तम ढुंगेलको लेखन, संकल्प भुजेलको छायाङ्कन, शम्भुजित बाँस्कोटा, दीपक शर्मा, महेश खड्का र बाबुल गिरीको सङ्गीत, भुपेन्द्र अधिकारीको सम्पादन, मनोरञ्जन श्रेष्ठको कलर करेक्सन, रामजी लामिछाने र निशा रसाइलीको नृत्य निर्देशन रहेको छ ।