फागुण २५ मा सौगात, नाजिर र मलिकाको ‘अगस्त्य’ रिलिज हुने पक्का

बक्स अफिसमा यो वर्षको महाशिवरात्रिमा चर्को भिडन्त हुने देखिएको छ । यो मितिमा फिल्मको लामो लाइनअप देखिएको छ । यो मितिमा फिल्म ‘रंगेली, काँडेतार र उपहार’ रिलिज हुने पक्का भइसकेको छ । अब, यही मितिमा सौरभ चौधरीले लेखन तथा निर्देशन गरेको फिल्म ‘अगस्त्य’ पनि रिलिज हुने पक्का भएको छ । निर्माणपक्षले केही दिनमै फस्टलुक सार्वजनिक गर्दै फिल्मको प्रदर्शन मिति घोषणा गर्न लागेको हो । 

मेरो फिल्मलाई विशेष श्रोतले दिएको जानकारी अनुसार, ‘अगस्त्य’को अर्थ भगवान् शिवसँग जोडिने भएकाले महाशिवरात्रिमै फिल्म रिलिज गर्न निर्माण पक्ष तयार भएको हो । 

यो फिल्ममा सौगात मल्ल, नाजिर हुसेन, मलिका महत्त लगायतका कलाकारको मुख्य भूमिका छ । फिल्मको छायांकन भारत र नेपालमा गरिएको छ । 

यो फिल्मलाई निर्माणपक्षले दुई च्याप्टरमा निर्माण गर्दैछ । पहिलो च्याप्टरको छायांकन सकेर पोष्ट प्रोडक्शनको काममा निर्देशक सौरभ चौधरी व्यस्त छन् । डार्क हर्स इन्टरटेन्मेन्टको ब्यानरमा निर्माण भएको यो फिल्ममा प्रकाश मल्ल र अनिष तामाङको लगानी छ । 

फिल्ममा सौगात मल्लको दुई वटा रुप हेर्न सकिनेछ । नाजिर, मलिकाको भूमिकाको विषयमा निर्माणपक्षले केही पनि खुलाएको छैन ।