पूजा शर्मासँग नयाँ हिरोको कनेक्शन

नायिका पूजा शर्माको २ वटा फिल्म रिलिजको तयारीमा छन् । फिल्म ‘उपहार’को छायांकन सकिएको छ र यो फिल्म फागूणको २५ गतेबाट रिलिजमा आउँदैछ । अर्को फिल्म ‘दान्भी’को दोश्रो चरणको छायांकन बाँकी नै छ । यो फिल्मको प्रदर्शन मिति तय गरिएको छैन । 

यी दुबै फिल्ममा पूजाले नयाँ नायकसँग काम गरेकी छिन् । उसो त, पूजाले नयाँ नायकसँग काम गरेको यो पहिलो पटक होइन । 

फिल्म ‘उपहार’को पत्रकार सम्मेलनमा पूजाले आफूलाई स्टार नायकसँग काम गर्न नलेखेको भन्दै नयाँसँग नै आफूलाई सधै फाप्ने गरेको तर्क गरिन् । पूजाको संकेत नायक अनमोल केसीसँग काम गर्न नजुरेको बिषयमा थियो । 

पूजाले आजसम्म काम गरेका नयाँ नायकहरुमा सोनम तोप्देन, सम्राटजंग कार्की र कुन्साङ बोमजम हुन् । 

पूजाले करिअरको सुरुवातमा आर्यन सिग्देलसँग काम गरिन् । तर, केही फिल्म नचलेपछि उनले काम गरेको फिल्म ‘प्रेमगीत’ थियो । यो फिल्ममा नायक प्रदीप खड्काले काम गरे । पूजा र प्रदीप यही फिल्मबाट स्टार भएका हुन् । यसपछि, यी दुइको जोडी जम्न सकेको छैन । 

यसपछि, पूजाले नायक पल शाह, आकाश श्रेष्ठ जस्ता नायकहरुसँग पनि काम गरिन् । यी नायकहरुले पूजा भन्दा अगाडि अन्य नायिकासँग काम गरेपनि उनीहरु जमेको पूजासँग काम गरेपछि हो । 

तर, सोनम तोप्देन, कुन्साङ बोमजम, सम्राटजंग कार्की भने फिल्म क्षेत्रका लागि नयाँ हुन् । जसले, पूजासँग डेब्यू नायकको रुपमा जोडी बाँधेका छन् । 

उसो त पूजालाई, नायकहरुसँग सम्बन्ध बलियो बनाउन नसकेको आरोप पनि लाग्दै आएको छ । जो कलाकारसँग काम गर्यो, उसैसँग पूजा झगडा गर्छिन् भन्ने टिप्पणी पनि फिल्म बजारमा सुनिन्छ । 

तर, पनि नयाँ नायकहरुसँग पूजाको कनेक्शन सुखद नै मानिदै आएको छ । पूजा, यसपटक समर्पणसँग पनि जोडी जम्नेमा विश्वस्त छिन् ।