ह्याप्पी बर्थ डे आकाश श्रेष्ठ

नायक आकाश श्रेष्ठले आज आफ्नो जन्मदिन मनाउँदैछन् । आकाशले आज बिहानै मुलपानीमा रहेको स्नेहा आश्रममा पुगेर बालबालिकासँग जन्मदिन मनाए । जन्मदिन मनाउने क्रममा आकाशले आश्रमलाई ५० हजार नगद सहयोग समेत गरेका छन् । 

आकाशको जन्मदिन हरेक बर्ष विशेष हुने गरेको छ । उनका फ्यानले हरेक बर्ष उको जन्मदिन विशेष रुपमा सेलिब्रेशन समेत गर्दै आएका छन् । 

नेपाली फिल्म क्षेत्रमा ‘म त तिम्रै हुँ’बाट प्रवेश गरेका आकाशले यसपछि पछाडि फर्किएर हेर्नु परेको छैन । उनले फिल्मी क्षेत्रसँगै म्युजिक भिडियोमा पनि राम्रो स्थान बनाएका छन् । आकाशले यसपछि ‘ब्ल्याक, रामकहानी, पोई पर्यो काले, संझना विर्सना, सम्हालिन्छ कहिले मन, हिड्दा हिड्दै’ लगायतका फिल्ममा काम गरेका छन् । 

आकाश बेलाबखत प्रेम चर्चाका कारण पनि मिडियामा छाउँछन् । आकाशले अभिनय गरेको ‘हिड्दा हिड्दै’ यो बर्ष रिलिज भएको थियो । यसपछि, उनले नयाँ फिल्म भने साइन गरेका छैनन् । 

आकाशको लुक्सको सर्वाधिक धेरै चर्चा नेपाली फिल्म क्षेत्रमा हुने गरेको छ । आकाशले अब चाडै नै एउटा राम्रो प्रोजेक्टको साथमा दर्शकमाझ आउने बताउँदै आएका छन् । 

म्युजिक भिडियोमा भने आकाशको राज नै चल्दै आएको छ । अझ, विशेषगरि विगत केही महिनादेखि आकाश र मोडल करुणा श्रेष्ठले म्युजिक भिडियोमा एकसाथ धेरै काम गर्दै आएका छन् । आज आफ्नो जन्मदिन मनाइरहेका आकाशलाई धेरै धेरै शुभकामना ।