फिल्म उपहारको पहिलो गीत 'वाह वाह वाह' सार्वजनिक

फिल्म 'उपहार' को पहिलो गीत 'वाह वाह वाह' सार्वजनिक भएको छ । यो फिल्मको गीत रिलिजसँगै प्रदर्शन मिति समेत घोषणा गरिएको छ ।

अभिनेत्री रेखा थापाले निर्माण गरेको फिल्म ‘उपहार’को शुक्रबार निमार्ण टिमले पत्रकार सम्मेलनको आयोजना गर्दै रोमान्टिक र डान्सिङ विटको गीत सार्वजनिक गरिएको हो ।

सार्वजनिक गीतमा बाबुल गिरी र एलिना चौहानको स्वर रहेको छ । गीतमा बाबुल गिरीकै संगीत र शंकर अधिकारीको घायलको शब्द रहेको छ ।

रोमान्टिक र डान्सिङ भावना प्रस्तुत गरेको यस गीतको भिडियोमा तीन जोडी जोडीको रुपमा रेखा थापा र मुकुन भुषाल, पूजा शर्मा र समर्पणजंग कार्की, बेनिशा हमाल र तेज गिरीलाई प्रस्तुत गरिएको छ । भिडियोलाई कविराज गहतराजले कोरियोग्राफी गरेका हुन् ।

रेखा फिल्मस् र कपनगढी सिनेमा प्रा.लीको संयुक्त प्रस्तुति रहेको फिल्मलाई ज्ञानेन्द्र देउजाले निर्देशन गरेका हुन् । फिल्मको कथा सुलक्षण भारतीले लेखेका हुन् । 

शुलभ प्रतीक देउजा र समीक्षा देउजा निर्माता रहेको फिल्मको कार्यकारी निर्मातामा बलराम शाही ठकुरी छन् । यो फिल्म फागुन २५ गते रिलिज हुने भएको छ ।