आउँदो दशैंमा दीपकराज भर्सेस सन्तोष सेन

यो बर्षको दशैं नेपाली फिल्मका लागि सुखद बन्यो । पारिवारिक फिल्मका लागि २० करोड माथिको व्यापार दशैंमा हुन सक्ने पनि देखियो । 
यसैले, दशैं नेपाली फिल्मका लागि सधै नै विशेष बन्ने गरेको छ । यो बर्षको दशैं आजबाट बिदा हुँदै गर्दा अर्को बर्षको दशैंका लागि समेत फिल्मको भिडन्त सुरु भैसकेको छ । 

अर्को बर्षको दशैंको फूलपातिमा निर्माता तथा निर्देशक सन्तोष सेनले फिल्म ‘बलिदान’को घोषणा गरिसकेका छन् । यो फिल्मले देशको अवस्थाको कथा भन्ने सेनको तर्क छ । फिल्मको घोषणा टिजर तिहारमा सार्वजनिक हुनेछ ।

सन्तोष सेन फिल्म निर्माणमा मात्र नभएर, प्रचारमा समेत विशेष ध्यान दिने मेकर हुन् । अझ, फिल्म रिलिजका लागि उनको ‘मास्टर माइन्ड’ले सधै काम गर्ने गरेको छ । यसैले, आउँदो बर्षको दशैंमा उनले फिल्मको प्रचारमा तहल्का मच्चाउने कुरामा दुईमत छैन । 

यता, आउँदो बर्षको दशैंमा ब्लकबस्टर मेकर दीपकराज गिरीले पनि फिल्म रिलिज गर्ने घोषणा गरिसकेका छन् । लगातार २ वटा दशैं मिस गरेका दीपकले मेरो फिल्मसँगको कुराकानीमा नै आउँदो बर्षको दशैंमा फिल्म रिलिज गर्ने घोषणा गरेका थिए । 

दीपकको फिल्मले व्यापारिक रुपमा दशैंमा मात्र नभएर अरु समयमा पनि दर्शकको उच्च साथ पाउँदै आएका छन् । आउँदो बर्ष उनी दशैंमा फिल्म रिलिज गर्न तयार छन्, जसले व्यापारिक रुपमा सफलता पाउने कुरामा दुइमत छैन । दीपकले यसपटक फिल्म ‘छक्का पन्जा ५’ बनाउँछन् या अरु नै नाममा तयार पार्छन् पक्का छैन । तर, यसपटक उनले आउँदो बर्षको दशैंमा फिल्म रिलिज गर्ने पक्का हो । 

दीपक फिल्म निर्माणमा मात्र होइन, प्रचारमा पनि ‘मास्टर माइन्ड’ प्रयोग गर्ने मेकर हुन् । जसकाकारण, यसपटक दुई ‘मास्टर माइन्ड’ निर्माताको भिडन्त बक्स अफिसमा हुने देखिन्छ । 

तर, यसपटकको दशैंले पनि के देखाएको भने, लामो बिदामा २ वटा ठूला फिल्म आउँदा दर्शकले दुबैलाई माया गर्छन् । लामो रेशको घोडा बन्नका लागि त फिल्म नै उत्कृष्ट बन्नुपर्ने हुन्छ ।