सत्य घटनाबाट प्रभावित कथामा निर्माण भएको ‘कैँची’को टिजर सार्वजनिक

बडादशैंको अवसर पारेर वेब सिरिज ‘कैँची’को निर्माण घोषणा गरिएको छ ।

सत्य घटनाबाट प्रभावित कथामा निर्माण भएको वेब सिरिजको एक टिजर सार्वजनिक गर्दै औपचारिक रूपमा निर्माण घोषणा गरिएको हो ।

मधेशको सेटअपमा खिचिएको टिजरमा अभिनेता कामेश्वर चौरासिया, अभिनेत्री काजल कर्ण, रियाज आचार्य र दीपक आरजेलाई स्थान दिइएको छ ।

सिरिजमा पारिवारिक सम्बन्ध र त्यसले ल्याउने कलहलाई पर्दामा ल्याउने जमर्को निर्माण टिमले गरेको छ ।

बिशेषगरी नेपालको तराई क्षेत्रमा घट्ने विभिन्न घटनामा यो रिलिज बन्ने छ । कैँचीको कथा अभिनेता कामेश्वर चौरासिया आफैले लेखेका हुन् । पटकथा तथा संवाद लेखनमा भने उनलाई निर्देशक नरेशनाथ योगी किङ योगीले सघाएका छन् । यो सिरिजको निर्देशन पनि नरेश आफैले गर्दै छन् ।

बड्डी इन्टरटेनमेन्ट र ढाका टोपी फिल्मस्को ब्यानरमा निर्माण हुने सिरिजमा समिर खरेल र दीपक आरजे निर्माताको रूपमा रहेका छन् । मित्र डि गुरुङको सम्पादन, राजेन्द्र मोक्तानको कलर, मनिष भट्टको मुख्य सहायक निर्देशन, शैलेस श्रेष्ठको ब्याकग्रराउण्ड म्युजिक, कबिन खड्काको मेकअप, निसाल पौडेलको डिओपी वेब सिरिजमा रहनेछ ।