‘पशुपति प्रसाद २’को ओपनिङ २ करोड माथि

दशैंको अवसर पारेर शनिबारदेखि रिलिजमा आएको फिल्म ‘पशुपति प्रसाद २ः भष्मे डन’ले बक्स अफिसमा बिष्फोटक सुरुवात गरेको छ । फिल्म रिलिजपूर्व निकै नै राम्रो हाइप बनाएको यो फिल्मले शनिबार उच्च अकुपेन्सीको साथ दर्शकको माया पाएको छ । 

देशभरका अधिकांश हल बिहानैदेखि हाउसफूल थिए । फिल्मका वितरक करण श्रेष्ठ क्रेजीका अनुसार शनिबार फिल्मको व्यापार २ करोड माथि छ । उनले भने–‘सबैतिरको हिसाब त आइसकेको छैन । तर, फिल्मले २ करोड माथिको ओपनिङ गर्ने पक्का देखिएको छ । संभवत २ करोड ४० लाखसम्म पुग्न सक्छ ।’

यो नेपाली फिल्मका लागि बम्पर ओपनिङ हो । दशैंमा फिल्म हेरेर फर्किएका अधिकांश दर्शकले यसलाई मन पराएका छन् । शनिबार हलमा पुगेका अधिकांश दर्शकले मिडियासँग प्रतिक्रिया दिदै एउटा उत्कृष्ट फिल्म हेर्न पाएको बताए । उनीहरुले, फिल्मको तेश्रो सिक्वेलको माग समेत गरेका थिए । 

निर्देशक दीपेन्द्र के खनालले हलमा पुगेका दर्शक खुशी भएर फर्किएको बताए । खगेन्द्र लामिछानेको लेखन तथा निर्माणमा तयार भएको फिल्ममा विपिन कार्की, सौगात मल्ल, स्वस्तिमा खड्का, रविन्द्र सिंह बनियाँ, प्रकाश घिमिरे लगायतका कलाकारको अभिनय छ । 

फिल्मले दशैंको एक साता लामो बिदामा विष्फोटक व्यापारलाई कायम नै राख्ने देखिएको छ । आज पनि बिहानैदेखि देशभरका हलमा दर्शकको अकुपेन्सी उच्च छ । आज पनि यो फिल्मले २ करोड आसपासमा व्यापार गर्ने प्रक्षेपण गरिएको छ ।