‘दिमाग खराब’ ट्रेलरमा जनता र शक्तिको कथा

तिहारको अवसर पारेर आगामी कार्तिकको २४ गतेबाट रिलिजमा आउन लागेको निश्चल बस्नेत निर्देशित फिल्म ‘दिमाग खराब’को ट्रेलर सार्वजनिक गरिएको छ ।

सिनेमा आर्टस् प्रा.लि र ब्ल्याक हर्स पिक्चर्स प्रा.लिको निर्माणमा तयार भएको यो फिल्मले एक भूईमान्छे कसरी देशमा नियम कानुनका बाबजुत मुठ्ठीभरका भ्रष्ट सत्ताधारीबाट शोषित र पीडित छन् भन्ने विषयको नेपथ्यमा उसले सोका विरुद्ध गर्ने संघर्षको कथा पेस गर्छ ।

झण्डै आधा दर्जन बढी चलेका कलाकारको अभिनय रहेको फिल्मको ट्रेलरले दर्शकलाई फरक विषय पस्कने संकेत गरेको छ ।

फिल्ममा खगेन्द्र लामिछाने, दयाहाङ राई, स्वस्तिमा खड्का, अपर्ण थापा, विजय बराल, सुमन कार्की, पुष्कर गुरुङ, माओत्से गुरुङ, राजन खतिवडा, रमा थपलिया, गौरभी आरएल सिंह, गीत अधिकारी, कृष्णभक्त महर्जन, धीरज भट्ट, राहुल सिवाकोटी, नविन खड्कालगायतको अभिनय हेर्न सकिन्छ ।  

यस्तै, फिल्मको एक गीतमा निर्देशक निश्चल बस्नेत र अभिनेत्री सुपुष्पा भट्ट विशेष भुमिकामा देखिएका छन् ।

आकाश बरालको लेखन र मनोज पण्डित स्क्रिप्ट डाक्टर रहेको फिल्म राजनीतिक विषयमा केन्द्रित रहेर निर्माण भएको हो । फिल्ममा रौनक विक्रम कँडेल निर्माता र सुरज बम ठकुरी कार्यकारी निर्माताको रुपमा रहेका छन् ।

फिल्ममा सुसन प्रजापतिको छायांकन, निमेष श्रेष्ठको सम्पादन, जयन के बाइबा र बाबुल गिरीको संगीत, राजकुमार उप्रेतीको द्वन्द्व निर्देशन तथा रोहित शाक्यको ब्याकग्राउन्ड स्कोर छ ।