रिलिजको अनौठो क्यालेन्डरः ३ दिनमा ३ नयाँ फिल्म रिलिज

फिल्म रिलिजको अनौठो क्यालेन्डर यसपटकको दशैंमा देखिएको छ । यसअघि कहिले पनि नदेखिएको अनौठो शैली यसपटक देखिएको छ । जसकाकारण, प्रदर्शकहरुलाई पनि शोज मिलाउन हम्मे हम्मे परिरहेको छ । 

यसअघि, बुधबार नयाँ फिल्म रिलिज भएका थिए । बिहिबार भने केही नेपाली र केही बलिउड फिल्म रिलिज भएको उदाहरण छ ।

तर, शुक्रबार फिल्म रिलिज हुने प्रथा यसपटक पुरै अस्तव्यस्त बनेको छ । चाडपर्वका कारण यसपटक निर्माताहरुले आफूले चाहेको मितिमा फिल्म रिलिज गरेका छन् । 

यसपटक, बिहिबार, शुक्रबार र शनिबार नै नयाँ फिल्म रिलिज हुँदैछन् । यस्तो, क्यालेन्डर यस अगाडि बनेको थिएन । 

यसपटक, बिहिबार अर्थात भोलीबाट फिल्म ‘लियो’ रिलिज हुँदैछ । थलापति विजयको महत्वकांक्षी यो फिल्म बिहिबार रिलिज हुँदा गत शुक्रबारदेखि रिलिजमा आएको नेपाली फिल्म ‘परदेशी २’को शोजमा असर परेको छ । यस्तै, शुक्रबारदेखि टाइगर श्राफ र कृति सेनन अभिनित एक्सन फिल्म ‘गणपत’ रिलिज हुँदैछ । यो फिल्म शुक्रबार रिलिज हुँदा बिहिबारबाट रिलिज हुने फिल्म ‘लियो’को शोज केही कटौती भएको छ ।

यसपटक, नेपाली फिल्म शनिबार रिलिज हुँदैछ । शनिबारबाट फिल्म ‘पशुपति प्रसाद २ः भष्मे डन’ रिलिज हुँदैछ । यो फिल्म शनिबार रिलिज हुँदा बिहिबार र शुक्रबारबाट रिलिज हुन लागेका दुई हिन्दी फिल्मको शोज शनिबार भारी कटौती भएको छ । यी तिनै फिल्मका कारण फिल्म ‘परदेशी २’ दोश्रो सातामा निकै कम शोजमा खुम्चिएको छ । 

फिल्म रिलिजको यो शैलीले आगामी दिनमा निर्माताले कुनै चाडपर्वमा आफूलाई मन लागेको मितिमा फिल्म रिलिज गर्न चाहेको खण्डमा पाउँछन् या पाउँदैनन् भन्ने प्रश्न पनि उठेको छ । 

तिहारमा पनि नेपाली फिल्म ‘दिमाग खराब’ शुक्रबार रिलिज हुँदा बलिउड फिल्म ‘टाइगर ३’ आइतबार रिलिज हुँदैछ ।