अनमोलको ‘फर्की फर्की’को वर्कशप सुरु, जेठ ११ बाट रिलिज हुने

नायक अनमोल केसीले फिल्म ‘फर्की फर्की’को वर्कशपमा आफूलाई जोडेका छन् । निर्माता रोहित अधिकारीका अनुसार, यो फिल्मको वर्कशप सुरु गरिएको हो । फिल्मको वर्कशपमा नायक अनमोल केसीसँगै नव–कलाकारद्धय समृद्धि अर्याल र रवि काफ्ले जोडिएका छन् । फिल्मकी मुख्य नायिका जसिता गुरुङ भने केही दिनपछि मात्र वर्कशपमा जोडिने निर्माणपक्षले बताएको छ । यो फिल्ममा सुयोग गुरुङको निर्देशन रहनेछ । 

यो फिल्मको छायांकन मंसिरको १ गतेबाट सुरु हुनेछ । फिल्मको वर्कशप सुरु भएसँगै निर्माणपक्षले प्रदर्शन मिति पनि घोषणा गरेका छन् । फिल्मलाई वि.सं २०८१ सालको जेठ ११ गतेबाट रिलिज गर्ने तयारी निर्माणपक्षले गरेको हो । लभ स्टोरी कथामा निर्माण हुने फिल्मको छायांकन काठमाडौं र पोखरामा हुनेछ । 

फिल्ममा रोहितको साथमा ओएसआर डिजिटलको लगानी रहनेछ । फिल्ममा मनोज वली र राम न्यौपाने सह–निर्माताको रुपमा छन् । फिल्ममा नरेन्द्र मैनालीको छायांकन, रोमन बज्राचार्य, नरेन लिम्बु र अनमोल गुरुङको संगीत रहनेछ । 

यो फिल्मलाई नायक अनमोल केसीले पनि महत्वकांक्षी प्रोजेक्टको रुपमा लिएका छन् । फिल्मलाई काठमाडौंमा काफिया फिल्मस् र मोफसलमा कुबेर फिल्मस्ले वितरण गर्नेछ । फिल्मको अन्तरराष्ट्रिय वितरकको रुपमा एमएसएम इन्टरटेन्मेन्ट जोडिएको छ ।