‘परदेशी २’ हेरेर दर्शकले के भने ?

शुक्रबारदेखि रिलिजमा आएको फिल्म ‘परदेशी २’ले शनिबार काठमाडौंसँगै देशका विभिन्न हलहरुमा सुखद व्यापार गरेको छ । दशैंको छेकोमा रिलिज भएको हिट फिल्मको सिक्वेललाई दर्शकले रुचाएका छन् । फिल्म हेरेर हलबाट निस्किएका अधिकांश दर्शकले यसको कथावस्तुले छोएको बताए । 

फिल्मले बिदेश जाने यूवायूवतीको पीडा, परिवारले भोग्ने दुख आदिलाई प्रस्तुत गरेको भन्दै कतिपय दर्शकले आफूहरु भावुक भएको सुनाए । 

नारायण रायमाझीको निर्देशनमा तयार भएको यो फिल्ममा राजेश वंशलको लगानी छ । फिल्ममा केकी अधिकारी, प्रकाश सपुत, प्रशान्त तामाङ, दिलिप रायमाझी, वर्षा सिवाकोटी लगायतका कलाकारको अभिनय छ । 

शुक्रबार कमजोर ओपनिङ गरेको फिल्मको व्यापार शनिबार भने बढेको छ । आज आइतबार पनि घटस्थापनाको बिदा भएकाले फिल्मले फाइदा लिन सक्छ । 

फिल्मले दर्शकबाट भने मिश्रित प्रतिक्रिया पाएको छ । समीक्षकहरुले फिल्मलाई औषत भनेका छन् । निर्देशक रायमाझीको फिल्म निर्देशनमा आफ्नै शैली छ । उनले, ‘परदेशी २’मा पनि उक्त शैली भने छाडेका छैनन् ।