अर्को बर्षको दशैंमा ‘छक्का पन्जा ५ वा वडा नम्बर ६’: दीपकराज गिरी

लगातार २ वटा दशैंमा फिल्म रिलिज गर्न नपाउँदा निर्माता तथा निर्देशक दीपकराज गिरीको मन केही खल्लो भएको छ । २ वर्ष अगाडि सम्म दशैं भन्ने वित्तिकै दीपकको फिल्म हलमा लाग्छ भन्ने सोच आम दर्शकमा परिसकेको थियो । तर, गतबर्षदेखि दीपकको टिमले दशैंमा फिल्म रिलिज गर्न सकिरहेको छैन । 

तर, आउँदो बर्षको दशैंमा भने आफूहरुको फिल्म आउने दीपकले मेरो फिल्मलाई जानकारी दिए । उनले भने–‘छक्का पन्जा’लाई यसपटकको दशैंमा मिस गरिरहेको छु । तर, अर्को बर्ष भने फिल्म दशैंमा नै रिलिज गर्ने तयारी छ । यसैले, दर्शकलाई आउँदो बर्षको दशैंसम्म प्रतिक्षा गरिदिन आग्रह गर्दछु ।’

दीपकले फिल्मलाई यसपटक आफूले राजनीतिक कथा भन्दा केही फरक बनाउने कोशिश गरेको बताए । दीपकले फिल्मको कथामा राजनीतिक कथा भित्राएपछि अहिले धेरैले यसैलाई पछ्याइरहेका छन् ।

दीपक यसलाई सुखद कुरा भएको बताउँछन् । महिना दिन अघि मात्र नयाँ बाँनेश्वरमा ‘आइएनआई सिनेमाज्’ संचालनमा ल्याएपछि दीपक हलको प्रमोशनमा व्यस्त छन् । 

दीपकले भने–‘हामीलाई कथा लेख्न अझै ६ महिना लाग्छ । नाम के राख्ने भन्ने बिषयमा हामी जहिले पनि अन्तिममा निर्णय गर्छौ । ‘वडा नम्बर ६’ को सिरिज या छक्का पन्जा ५ पनि बन्न सक्छ ।’

दीपकले नयाँ बर्ष लागेपछि मात्र फिल्मको छायांकन सुरु गर्ने संकेत गरे । तर, फिल्मलाई भने दशैंमा नै रिलिज गर्ने घोषणा उनले गरेका छन् ।