‘उपहार’को सेटमा पूजासँगै सुष्मा, के फिल्ममा देखिन लागेकी हुन् ?

नायिका पूजा शर्मा र सुष्मा कार्कीबीचको दुश्मनीको विषयमा आम मानिसहरू जानकार नै छन् । सुष्माले पूजाको बारेमा दिने अभिव्यक्तिले पनि उनीहरुबिचको सम्बन्ध सबैलाई थाहा छ । पूजाले भने आजसम्म सुष्माको बारेमा आक्रामक अभिव्यक्ति दिएकी छैनन् ।

तर, सुष्माको आक्रामक अभिव्यक्ति बेलाबखत चर्चामा आउने गरेको छ । सुष्मा र पूजाबीच बोलचाल छैन । यसैले, उनीहरूले एकैसाथ काम गर्ने भन्ने त उनीहरूका फ्यानको कल्पनामा पनि आउँदैन । 

तर, बिहिबार बेलुकी नायिका सुष्मा कार्कीले सामाजिक संजालमा पोष्ट गरेको २ वटा भिडियोले भने पूजाका फ्यानहरुको समेत ध्यान खिचेको छ । सुष्माले उपहारको सेटबाट २ वटा भिडियो स्टोरीमा पोष्ट गरेकी छिन् । जहाँ, फिल्मका मुख्य ३ नायिकाहरू रेखा थापा,  पूजा शर्मा र बेनिशा हमालसँगै उनी पनि देखिएकी छिन् ।

यसले, कतै फिल्ममा सुष्मा कार्कीको पनि प्रवेश भएको त होइन भन्ने आम मानिसहरूलाई पर्न गएको छ । यस विषयमा मेरो फिल्मसँग कुरा गर्दै निर्देशक ज्ञानेन्द्र देउजाले भने–‘सुष्माजीको फिल्ममा कुनै पनि भुमिका छैन । रेखाजी र उहाँ साथी भएकाले सुटिङ सेटमा आउनु भएको मात्र हो ।’

तर, सुष्माको स्टोरी हेर्दा उनले फिल्ममा अभिनय पनि गरेको देख्न सकिन्छ । किनकी, मिडियामा निर्देशक देउजाले सुष्मा सेटमा रेखालाई मात्र भेट्न आएको बताए पनि उनै देउजाले सुष्मालाई नै क्यामेराको फ्रेममा राखेर निर्देशन गर्दै गरेको भिडियो हेर्न सकिन्छ । 

सुष्मा कार्कीको सरप्राइज इन्ट्रीले फिल्मको गसिप बजारमा चर्चा हुने निश्चित छ । यो फिल्म माघको २६ गतेबाट रिलिज हुँदैछ ।