यो बर्ष दयाका ९ फिल्म हलमा

विगत केही बर्षदेखि नेपाली फिल्म क्षेत्र नायक दयाहाङ राइको वरि परी घुमेको छ भन्दा फरक पर्दैन । फिल्म सुटिङको चापमा दयाहाङ यसरी दौडिरहेका छन् कि, उनलाई त कुन फिल्मको छायांकन भइरहेको छ भन्ने समेत थाहा पाउन मुस्किल हुने अवस्था आएको छ ।

रोचक कुरा त के छ भने, यो वर्ष मात्र दयाको फिल्म रिलिजको सेड्यूल हेर्ने हो भने औसतमा डेढ महिनामा एउटा फिल्म हलमा लाग्ने देखिएको छ ।

फिल्म छायांकनको सेड्यूलको कुरा गर्दा त उनी १२ महिना नै व्यस्त हुने देखिन्छ । दयाको असोज महिनाको अन्तिम सातासम्म आइपुग्दा ४ वटा फिल्म रिलिज भइसकेका छन् । ‘बिहे पास, जारी, निरफूल र नांगो गाउँ’ हलमा लागिसकेका फिल्म हुन् । जसमध्ये, ‘जारी’ ब्लकबस्टर भयो भने ‘नांगो गाउँ’ले निर्मातालाई सुरक्षित बनायो । 

जेठ, साउन र असोजमा दयाको कुनै पनि फिल्म रिलिज भएन । अब, कार्तिकको २४ गतेबाट दया अभिनीत फिल्म ‘दिमाग खराब’ रिलिज हुँदैछ ।

यो फिल्म रिलिज भएको ३ महिनासम्म उनका कुनै पनि फिल्म रिलिज हुने छैनन् । यसपछि, माघको २६ गते दया अभिनीत ‘हात्तीछाप’ रिलिज हुने पक्का भइसकेको छ । यसपछि, फागुनको २५ गते दयाको अभिनय रहने २ फिल्म ‘रंगेली र लोकल हिरो’ रिलिज हुने पक्का भइसकेको छ ।

यसपछि, नयाँ बर्षको छेको पारेर चैत्रको अन्तिम साता दया अभिनित फिल्म ‘डिग्री माइला’  रिलिज हुँदैछ । यसरी हेर्दा, एक बर्षमै दयाका ९ वटा फिल्म रिलिज हुने पक्का भएको छ । 

फिल्म छायांकनको कुरा गर्दा दयाले यो बर्ष ‘नांगो गाउँ, हात्तीछाप, दिमाग खराब, रंगेली, डिग्री माइला, लोकल हिरो, कार्साङ’को छायांकन गर्नेछन् ।