सौगात मल्लको इन्ट्रीसँगै के ‘पशुपति प्रसाद ३’ बन्छ ?

‘पशुपति प्रसाद’मा कलाकार खगेन्द्र लामिछानेले शीर्ष भूमिकामा काम गरे । यो फिल्मले खगेन्द्रलाई केन्द्रीय भूमिकामा स्थापित गर्यो । तर, यही फिल्मबाट नायक विपिन कार्की पनि उदाए । ‘भष्मे डन’ पात्रको रुपमा विपिनको उदय मात्र भएन, चर्चामा पनि आयो । 

फिल्म रिलिज भएसँगै यसको सिक्वेलको माग पनि खुबै भयो । निर्माण पक्षले ७ बर्षपछि ‘भष्मे’ पात्रलाई नै केन्द्रमा राखेर ‘पशुपति प्रसाद २ः भष्मे डन’ निर्माण गरेको छ । फिल्मको हाइप ट्रेलर सार्वजनिक भएपछि उच्च छ ।

दर्शकमा फिल्मप्रतिको आकर्षण उच्च देखेकै कारणले हलले रिलिजको १२ दिन अगाडि नै बूकिङ खुलाएका छन् । यो फिल्मको ट्रेलरमा विपिनलाई जसरी स्थापित गरिएको छ, अर्का नायक सौगात मल्ललाई पनि गजबको स्थान दिइएको छ । ट्रेलर हेर्दा पनि फिल्ममा विपिन भर्सेस सौगातको कथामा फिल्म अगाडि बढ्ने बुझ्न सकिन्छ । 

जसरी, ‘पशुपति प्रसाद’मा विपिनलाई स्थापित गरिएको थियो त्यसरी नै ‘पशुपति प्रसाद २ः भष्मे डन’मा सौगातलाई स्थापित गरिएको छ । फिल्ममा विपिनलाई सकारात्मक लयमा डोहोर्याइएको निर्देशक दीपेन्द्र के खनालले पुष्टि गरिसकेका छन् । यसको अर्थ, फिल्ममा सौगात मल्लको उदय हुने कुरामा दुई मत छैन । 

निर्माणपक्षले फिल्मको तेस्रो सिक्वेलको लागि पनि स्थान प्रशस्त छाडेको बुझ्न सकिन्छ । किनकी, सौगात मल्ललाई नेगेटिभ तरिकाले स्थापित गदै विपिनलाई सकारात्मक बनाउनतर्फ लेखक खगेन्द्र लामिछाने लागेका छन् ।

फिल्मको कार्यक्रममा पनि खगेन्द्रले तेस्रो सिक्वेल बनाउनेतर्फ संकेत गरे । उनले भने–‘कुनै पनि प्रोडक्टको माग अनुसार नै त्यसलाई बजारमा ल्याउने हो । अब, दोस्रो सिक्वेलले गर्ने व्यापारले तेश्रोको कथा लेख्नेछ ।’

निर्देशक खनालले फिल्ममा एक जना मात्र खेलाडी हुँदा खेल रोचक नहुने भन्दै दुई पक्ष नै बलियो टिम चाहिने बताए । तर, फिल्ममा सौगात मल्ललाई प्रवेश गराउँदै यसको टिमले तेस्रो सिक्वेलका लागि पर्याप्त ठाउँ भने छाडेको बुझ्न सकिन्छ । फिल्मको पुरै कहानीका लागि त दर्शकले कार्तिक ४ गतेसम्म पर्खिनुपर्नेछ ।