फागुण २५ मा दया र मिरुनाको दुई फिल्म रिलिज हुने

यदि, निर्माताले मिलेर सहमति गरेनन् भने फागुणको २५ गते नायक दयाहाङ राई र नायिका मिरुना मगर अभिनित २ फिल्म रिलिज हुने पक्का भएको छ । 

नेपाली फिल्म बजारमा व्यापारिक रुपमा सफलताको ह्याट्रिक गरेपछि दया र मिरुनाको माग यस्तो छ कि, अब उनीहरुले अभिनय गरेका फिल्म समेत एउटै मितिमा जुध्न थालेका छन् । वैशाखको १ गते दया अभिनित ‘जारी र बिहे पास’ एकसाथ रिलिज भएका थिए ।

तर, दया र मिरुनाले नै अभिनय गरेका फिल्म एउटै मितिमा जुध्नु आफैमा दुखलाग्दोकुरा हो । दया र मिरुनाको साथमा अर्पण थापाको मुख्य भूमिका रहेको फिल्म ‘रंगेली’को निर्माणपक्षले फागुण २५ लाई प्रदर्शन मिति तय गरेर छायांकन सुरु गरेको थियो । फिल्मको छायांकन अझै पनि जारी छ । 

अब, यही मितिमा अर्को फिल्म ‘लोकल हिरो’ पनि रिलिज हुने भएको छ । सरोज न्यौपानेको निर्माणमा तयार हुन लागेको यो फिल्ममा पनि दया र मिरुनाले नै काम गर्दैछन् । मंगलबार मात्र यो  फिल्मले निर्माणको इजाजत पाएको हो ।

तिहार लगतै छायांकनमा जाने फिल्मलाई फागुण २५ गते महाशिवरात्रीको अवसरमा  रिलिज गर्ने घोषणा निर्माता न्यौपानेले गरिसकेका छन् । यसैले, दया र मिरुनाको २ फिल्म एकसाथ रिलिज पक्का भएको हो ।