दया र मिरुनालाई लिएर सरोजले घोषणा गरे ‘लोकल हिरो’

नेपाली फिल्म क्षेत्रको बर्तमान समयमा सर्वाधिक चर्चित जोडीको रुपमा नायक दयाहाङ राई र नायिका मिरुना मगरलाई चिनिन्छ । यो बर्ष मात्र यो जोडीले अभिनय गरेको ‘जारी र नांगो गाउँ’ फिल्मले बक्स अफिसमा सुखद कमाई गर्यो । यसले, यो जोडीको क्रेज अझै बढाएको छ । 

यसैबिच, निर्माता सरोज न्यौपानेले दया र मिरुनालाई मुख्य भूमिकामा अनुबन्धित गर्दै नयाँ फिल्म ‘लोकल हिरो’ निर्माणको घोषणा गरेका छन् । यो फिल्मले चलचित्र विकास बोर्डबाट निर्माणको इजाजत पाइसकेको छ । 

सरोजले यो फिल्मलाई फागुणको २५ गतेबाट रिलिज गर्ने घोषणा समेत गरिसकेका छन् । यो मितिमा दया र मिरुनाकै मुख्य भूमिका रहेको फिल्म ‘रंगेली’को समेत प्रदर्शन मिति तय गरिएको छ । यदि, दुई मध्ये एक निर्माता पछि हटेनन् भने, एउटै मितिमा दया र मिरुनाको २ वटा फिल्म रिलिज हुनेछन् । 

रोमान्टिक, कमेडी तथा सामाजिक कथामा बन्ने यो फिल्मलाई विश्वास तिमल्सिना र राज ऋषिले निर्देशन गर्दैछन् । यी दुइले बलिउडका केही ठूला फिल्ममा समेत काम गरिसकेका छन् । 

यो फिल्मको छायांकन तिहार लगतै सुरु गरिने निर्माता सरोज न्यौपानेले मेरो फिल्मलाई जानकारी दिए । उनका अनुसार फिल्मलाई काठमाडौं, काभ्रपलाञ्चोक र झापामा छायांकन गरिनेछ ।