‘पशुपति प्रसाद २’ ट्रेलरः ‘भष्मे डन’को एरियामा सौगात मल्लको चुनौती

फिल्म ‘पशुपति प्रसाद २ः भष्मे डन’को ट्रेलर आज एक कार्यक्रमको आयोजना गर्दै  सार्वजनिक गरिएको छ । दीपेन्द्र के खनाल निर्देशित यो फिल्मको ट्रेलरमा पशुपति क्षेत्रमा आफ्नो अस्तित्वको लडाई लडिरहेको भष्मे डन पात्रको कथालाई प्रस्तुत गरिएको छ । तर, यसपटक भष्मे डनलाई चुनौती दिदै फिल्ममा नायक सौगात मल्लको प्रवेश गराइएको छ । सौगात र केन्द्रिय पात्र विपिन कार्कीबिचको लडाइलाई फिल्म भित्र रोचक तरिकाले प्रस्तुत गरिएको ट्रेलरबाट वुझ्न सकिन्छ । 

फिल्ममा पशुपति क्षेत्रमा नै रमाइरहेकी स्वस्तिमा खड्कालाई दुर्गा माताको अवतारमा देखाइएको छ । खगेन्द्र लामिछानेको लेखन तथा निर्माणमा तयार भएको फिल्मले ‘पशुपति प्रसाद’को क्रेजलाई निरन्तरता दिने निर्माणपक्षको दाबी छ । 

सार्वजनिक ट्रेलरमा समावेश गरिएका केही रमाइला संवाद, विपिन कार्कीको संघर्ष, सौगात मल्लले दिएको चुनौती, स्वस्तिमाको गेटअपले दर्शकमा कौतुहलता थपेको छ । 

कार्तिक ४ गते फूलपातिको दिनबाट रिलिजमा आउन लागेको यो फिल्मले बक्स अफिसमा बम्पर व्यापार गर्ने अपेक्षा गरिएको छ । निरज कँडेलको डीओपी रहेको फिल्ममा कृष्ण बहादुर थापाको छायांकन, सुभाष भुषाल, कृष्ण भारद्धाज र किरण भुषालको संगीत, रेवन्द्र विक्रम थापाको एक्सन, प्रविण सिंहको कोरियोग्राफी छ ।