विदेशमा ‘पशुपति प्रसाद २’को शोज सोल्ड आउट, नेपालमा ब्लकबस्टर ओपनिङको प्रक्षेपण

कार्तिकको ४ गते फूलपातिबाट रिलिजमा आउन लागेको फिल्म ‘पशुपति प्रसाद २ः भष्मे डन’ले बक्स अफिसमा ब्लकबस्टर ओपनिङ गर्ने प्रक्षेपण गरिएको छ । दशैंको बिदाका कारण पनि फिल्मको पहिलो दिनदेखिकै व्यापार बम्पर हुने फिल्मकर्मीको आशा छ । फिल्मको नेपालमा मात्र नभएर, विदेशमा पनि उच्च क्रेज छ ।

यही कारण, फिल्मको ट्रेलर रिलिज नहुँदै यसको शोजहरु अष्ट्रेलिया, जापान, पोर्चुगल, दक्षिण कोरिया लगायतका देशमा खुलिसकेका थिए । 

यो फिल्मको बुकिङ विदेशमा पनि आक्रामक देखिएको छ । दक्षिण कोरियामा ५ वटा शोज खुलाएको थियो । रिलिजको २ साता अगाडि नै ५ वटै शोज सोल्ड आउट भैसकेका छन् । यसले, फिल्मको क्रेज नेपालमा मात्र नभएर विदेशी बजारमा पनि कस्तो छ भन्ने थाहा हुन्छ । 

यो फिल्मको ट्रेलर भोली सोमबार रिलिज हुँदैछ । यसपछि, फिल्मको क्रेज अझै बढ्ने अपेक्षा गरिएको छ । ७ बर्ष अगाडि रिलिजमा आएको ‘पशुपति प्रसाद’को सिक्वेलमा रुपमा तयार भएको ‘पशुपति प्रसाद २ः भष्मे डन’लाई दीपेन्द्र के खनालले निर्देशन गरेका हुन् । फिल्ममा खगेन्द्र लामिछानेको लेखन तथा निर्माण छ ।

फिल्ममा विपिन कार्की केन्द्रिय भूमिकामा छन् । उनको साथमा सौगात मल्ल, स्वस्तिमा खड्का, रविन्द्र सिंह बानियाँ लगायतका कलाकारको अभिनय फिल्ममा छ । यो फिल्मले पशुपति क्षेत्रमा आफ्नो अस्तित्व स्थापित गर्नका लागि लागिपरेको भष्मे डन पात्रको कथा भन्छ ।