कुरा वर्षा र विपिनको जोडीकोः ४ फिल्म रिलिज, ‘महाजात्रा’ पर्खदै

नेपाली फिल्म क्षेत्रमा केही महिनादेखि नायक दयाहाङ राई र नायिका मिरुना मगरको जोडीको चर्चा खुबै छ । यो जोडीले ३ वटा फिल्ममा काम गरिसकेको छ र ती तिनै  वटा फिल्मले बक्स अफिसमा राम्रो कमाई गरे । ‘कबड्डी ४ र जारी’ ब्लकबस्टर रहँदा ‘नाङ्गो गाउँ’ले हिटको व्यापार गर्यो । 

तर, फिल्म क्षेत्रमा नायक विपिन कार्की र नायिका वर्षा राउतको जोडीको चर्चा दया र मिरुनाको जस्तो भएको पाइदैन । व्यवसायिक र व्यक्तिगत रुपमा नै नजिक रहेका यी दुइले पनि फिल्म क्षेत्रमा एकपछि अर्को हिट फिल्म दिएका छन् । 

‘जात्रा र जात्रै जात्रा’ वर्षा र विपिनको हिट फिल्म हो । फिल्म ‘के घर के डेरा’मा पनि यी दुइको जोडीले दर्शकको माया पाएको थियो । भलै, फिल्म ‘गोपि’को व्यापार अपेक्षित भएन, तर उनीहरुको जोडीको चर्चा यो फिल्मबाट पनि भएको थियो । 

अब, यो जोडीले फिल्म ‘महाजात्रा’मा एकसाथ काम गर्दैछ । दशैं लगतै छायांकनमा जाने फिल्मको प्रि प्रोडक्शनको काम चलिरहेको छ । वर्षाले फिल्म ‘ऐँचो पैँचो’ रिलिज भएपछि काम गर्न लागेको फिल्म ‘महाजात्रा’ मात्र हो । यो फिल्ममा निर्देशक प्रदिप भट्टराइले विपिन र वर्षाको जोडीलाई कसरी देखाउने हुन्, त्यो हेर्न बाँकी छ । 

यी दुइले अभिनय गरेका ४ वटा फिल्म रिलिज भैसकेको छ भने, एउटा फिल्मको छायांकन सुरु हुने तयारीमा छ । वर्षा र विपिनको जोडीलाई पनि फिल्म क्षेत्रको चर्चित जोडीको रुपमा लिन सकिन्छ ।