दाङमा खुल्यो मल्टिप्लेक्स हल ‘भीएफएक्स सिनेमाज्’

दर्शकहरुले सुविधासम्पन्न हलमा फिल्म हेर्न थालेपछि देशभरका प्रदर्शकहरुले पनि आधुनिक शैलीमा हल निर्माण गरिरहेका छन् । सिंगल थिएटरको क्रेज हराउँदै जाँदा मल्टिप्लेक्सहरुको भने संख्या थपिदै गएको छ । 

यसैबिच, दाङमा पनि पहिलो पटक मल्टिप्लेक्स हल खुलेको छ । दुई वटा स्क्रिन रहेको यो हलमा ४ सय १२ सिट क्षमता छ । घोराही उपमहानगरपालिका वडा नम्बर ८ नारायणपुरस्थित सौँडिकुलामा ‘भीएफएक्स सिनेमाज्’ नाम दिएर मल्टिप्लेक्स हल खुलेको हो । यो हलको औपचारिक उद्घाटन भने असोजको २६ गतेबाट हुनेछ । हलमा फिल्म ‘परदेशी २’को प्रदर्शन गरेर उद्घाटन गर्ने तयारी संचालकको छ । 

हलका प्रबन्ध निर्देशक विजय रावत हुन् भने चेतन जङ्ग राना अध्यक्ष हुन् । नेपाली फिल्मका लागि दाङ राम्रो व्यापार गर्ने ठाउँ हो । तर, अन्य जिल्लामा मल्टिप्लेक्स हल संचालन आइसकेको अवस्थामा दाङमा भने सुविधा सम्पन्न हल थिएन । आवश्यकतालाई ध्यानमा राखेर नै हल संचालन गरिएको संचालकले बताएका छन् ।