‘दिमाग खराब’को ‘झम्के झमा झम’ गीत सार्वजनिक

कार्तिकको २४ गतेबाट रिलिजमा आउन लागेको फिल्म ‘दिमाग खराब’मा समावेश ‘झम्के झमा झम’ बोलको गीत आज काठमाडौंमा एक कार्यक्रमको आयोजना गर्दै सार्वजनिक गरिएको छ । 

सिनेमा आर्टस् प्रा.लि र ब्ल्याक हर्स पिक्चर्स प्रा.लिको निर्माणमा तयार भएको यो फिल्मलाई निश्चल बस्नेतले निर्देशन गरेका हुन् । सार्वजनिक गीतमा बाबुल गिरीको शब्द तथा संगीत, सुमित खड्का र नम्रता काफ्लेको स्वर छ । 

सार्वजनिक भएको यो गीतको भिडियोमा शेखर घर्ती मगरको कोरियोग्राफी छ । रौनक विक्रम कँडेलको निर्माणमा तयार भएको फिल्मका कार्यकारी निर्माता सुरज बम ठकुरी हुन् । फिल्ममा सुशन प्रजापतिको छायांकन छ । 

सार्वजनिक भएको गीतको भिडियोमा निर्देशक निश्चल बस्नेत, नायिका स्वस्तिमा खड्का, नायकहरु दयाहाङ राई, खगेन्द्र लामिछाने, अर्पण थापा, कलाकार बिजय बराल, पुष्कर गुरुङ, नायिका सुपुष्पा भट्टको डान्स हेर्न सकिन्छ । निर्माणपक्षले यो गीतलाई प्रमोशनल गीतको रुपमा प्रस्तुत गर्ने जनाएको छ । 

निमेष श्रेष्ठको सम्पादन रहेको यो फिल्मले सत्ता र जनता बिचको संघर्षको कथा भन्नेछ । फिल्ममा माओत्से गुरुङ, रमा थपलिया, गौरव आरएल सिंह, गीता, रञ्जन खतिवडा लगायतका कलाकारको अभिनय छ ।