‘पशुपति प्रसाद २ः भष्मे डन’का २ गीतले फिल्मबारे दिएको सन्देश

टिजरबाट निकै नै तारिफ कमाएको फिल्म ‘पशुपति प्रसाद २ः भष्मे डन’को निर्माणपक्षले दुई वटा गीत सार्वजनिक गरिसकेको छ । सार्वजनिक दुबै गीतको केन्द्रमा नायक विपिन कार्की छन् । फिल्मको केन्द्रमा नै उनी भएकाले गीतको भिडियोमा पनि उनी नै देखिनु स्वभाविक नै हो । 

यो फिल्मको दुबै गीत रोमान्टिक खालको छ । एउटा गीतमा भिडियो छायांकनका लागि पशुपति क्षेत्रमा पुगेकी नायिका आँचल शर्मा र फिल्मका मुख्य कलाकार भष्मे डनबिचको रोमान्स देख्न सकिन्छ । अर्को गीतमा फिल्मकै मुख्य कलाकार स्वस्तिमा खड्का र भष्मे डनबिचको रोमान्स हेर्न सकिन्छ । 

यी दुबै गीतले दिन खोजेको सन्देश के हो भने, यसपटक भष्मे डन फिल्ममा रोमान्टिक पनि बनेको छ भन्ने हो । यसअघि सुन खोज्नमा नै व्यस्त बनेको भष्मे यसपटक फिल्म भित्र यूवतीहरुसँग जिस्किन र उनीहरुको पछि लाग्न पनि माहिर बनेको छ भन्ने हो । 

यसले, भष्मे डनको गम्भिर पाटो मात्र नभएर रोमान्टिक पाटो पनि फिल्म भित्र भरपुर छ भन्ने देखाएको छ । स्वस्तिमा खड्काको माताको अवतार र रोमान्टिक अवतार भने दर्शकका लागि अझै कन्फ्यूजमा नै देखिएको छ । यो रहस्य फिल्मको ट्रेलर सार्वजनिक भएपछि मात्र थाहा हुनेछ । 

यो फिल्मलाई लिएर दर्शकमा मात्र नभएर, वितरक र प्रदर्शकमा पनि निकै ठूलो उत्साह छ । बक्स अफिसमा यो फिल्मले बम्पर कमाई गर्ने र केही रेकर्ड ब्रेक गर्ने अपेक्षा पनि गरिएको छ । यसैले, लेखक तथा निर्माता खगेन्द्र लामिछाने र निर्देशक दीपेन्द्र के खनालप्रति चुनौती अझै अगाडि बढेको छ । 

फिल्मको टिमले अहिलेसम्म नायक सौगात मल्लको भूमिका के हो भनेर दर्शकलाई जानकारी दिएको छैन । यसैले, ‘पशुपति प्रसाद’मा ‘भष्मे’ पात्र जन्मिए जस्तै ‘पशुपति प्रसाद २ः भष्मे डन’बाट सौगात मल्लको पात्र जन्मिन सक्ने अनुमान लगाउन सकिन्छ । कार्तिकको ४ गतेबाट रिलिज हुने फिल्मले १० करोड भन्दा कमको व्यापार गरेको खण्डमा यसले फिल्मीकर्मी, वितकर, प्रदर्शकको अपेक्षालाई निराशामा बदल्नेछ ।