उच्च अदालत पाटनले चलचित्र विकास बोर्डसँग माग्यो उत्कृष्ट फिल्म घोषणा नगर्नुको कारण

Mero Film

असोज ५, २०८० शुक्रबार १८:२७

फिल्म ‘प्रकाश’का निर्देशक दिनेश राउत, लेखक विकास सुवेदी र यो फिल्म छायांकन भएको ठाउँ जुम्लाका स्थानीय मिनराज आचार्यले चलचित्र विकास बोर्डलाई विपक्षी बनाएर हिजो बिहिबार उच्च अदालत, पाटनमा मुद्दा दर्ता गरे ।

उक्त दायर भएको रिट विरुद्ध उच्च अदालतले आज शुक्रबार राष्ट्रिय चलचित्र पुरस्कार-२०८० मा ‘सर्वोत्कृष्ट फिल्म’ घोषणा नगरिएकोमा बोर्डलाई कारण देखाऊ आदेश जारी गरेको छ ।

गत भदौ १२ गते राष्ट्रपति कार्यालयमा आयोजना भएको ‘राष्ट्रिय चलचित्र पुरस्कार तथा सम्मान समारोह’मा सर्वश्रेष्ठ फिल्म बाहेक अन्य विधामा मात्र अवार्ड प्रदान भएको थियो । अनपेक्षित रूपमा सर्वोत्कृष्ट फिल्म घोषणा नभएपछि यसबारे व्यापक विवाद भएको थियो । ‘उत्कृष्ट फिल्म’को विधा नै गायब बनाइएको भन्दै ‘प्रकाश’को टिम अदालत पुगेको थियो ।

बोर्ड विरुद्धको निवेदनमा निर्णायक समिति ‘जुरी’ले प्रतिवेदनमा सिफारिस गरेको फिल्मलाई नै उत्कृष्ट फिल्मको उपाधिबाट पुरस्कृत गर्न र जुरी कमिटीले गरेको निर्णयको सक्कल झिकाउनुपर्ने र उत्कृष्ट फिल्मको अवार्ड वितरण नगर्नुको कारण सार्वजनिक गर्नुपर्ने माग समेत परमादेश माग गरिएको छ । विपक्षी बोर्डका पदाधिकारीले कानूनले दिएको भन्दा बढी अधिकार प्रयोग गरी निर्णायक समितिले सिफारिस गरेको फिल्मलाई पुरस्कार प्रदान नगरी अधिकार दुरुपयोग गरेको आरोप निवेदनमा लगाइएको छ ।

उक्त रिट दायर गरिएपछि न्यायाधीश श्यामजी प्रधानको एकल इजलासले बोर्डको सो निर्णय विरुद्ध कारण देखाऊ आदेश जारी गरेको हो ।

अवार्डमा उत्कृष्ट फिल्मको विधा किन गायब पारियो भन्ने विषयमा अहिले चलचित्र विकास बोर्डले कुनै आधिकारिक धारणा सार्वजनिक गरेको छैन । तर, मिडियामा आएको खबर अनुसार जुरीले ‘उत्कृष्ट फिल्म’मा ‘प्रकाश’को नाम सिफारिस गरेका थिए । तर, सूचना तथा संचार मन्त्रालयको ठाडो हस्तक्षेपमा यो विधामा अवार्ड नबाँडिएको खबर सार्वजनिक भएको थियो ।

यस्तै, उच्च अदालतले विपक्षी चलचित्र विकास बोर्डलाई राष्ट्रिय अवार्ड छनोटका क्रममा निर्णायक समितिले तयार पारेका सबै सक्कल कागजपत्र पनि माग गरेको छ ।

उत्कृष्ट फिल्मबाहेक बाँडिएको अवार्डमा ‘प्रकाश’ले उत्कृष्ट निर्देशक र उत्कृष्ट अभिनेत्री विधामा अवार्ड जितेको थियो ।

यो पनि पढ्नुहोस्