‘परदेशी २’को ‘हिजो काम’ बोलको गीत सार्वजनिक

असोजको २६ गतेबाट रिलिजमा आउन लागेको फिल्म ‘परदेशी २’मा समावेश ‘हिजो काम’ बोलको गीत सार्वजनिक गरिएको छ । यो गीतले परदेशीकै कथा वाचन गरेको छ । सतिष चापागाँइको शब्दमा तयार भएको यो गीतमा प्रशान्त तामाङको स्वर, बीबी अनुरागीको संगीत छ ।

यो गीतको भिडियोमा फिल्मका मुख्य कलाकारहरु प्रकाश सपुत, दिलिप रायमाझी र रमा थपलियालाई प्रस्तुत गरिएको छ । नारायण इन्टरनेसनलको प्रस्तुतिमा  राजेश वंशल र नारायण रायमाझीको संयुक्त लगानीमा तयार भएको यो फिल्ममा केकी अधिकारी, वर्षा सिवाकोटी, नीर शाह, रमा थपलिया, सबिन बास्तोला, देवेन्द्र बब्लु लगायतका कलाकारको अभिनय छ ।

रमेश बीजीको कथामा तयार भएको यो फिल्मले उच्च शिक्षाका लागि विदेश जाने विद्यार्थीको कथालाई प्रस्तुत गर्दछ । मानकृष्ण महर्जनको छायांकन, अष्ट महर्जनको एक्सन, रामजी लामिछाने र गोविन्द राइको कोरियोग्राफी रहेको यो फिल्ममा दीर्घ खड्काको सम्पादन छ ।