साम्राज्ञीले गुमाएको एउटा अवसर

नायिका साम्राज्ञी राज्यलक्ष्मी शाहले अभिनय गरेका २ फिल्म गतबर्ष बक्स अफिसमा पछारिए । नेपाली फिल्म क्षेत्रमा केही बर्ष अगाडि सर्वाधिक चर्चामा रहेकी साम्राज्ञीको स्टारडम अहिले ओझेलमा छ । उनलाई लिएर फिल्म बनाउन चाहने निर्माताहरुमा पनि उत्साह छैन । 

उनै, साम्राज्ञीले अभिनय गरेको फिल्म ‘नाङ्गो गाउँ’ शुक्रबारदेखि हलमा लागिरहेको छ । यो फिल्मको व्यापार सुरुवाती दिनमा आक्रामक रह्यो । आज तीजको बिदाको फाइदा फिल्मले उठाइरहेको छ । यसरीहेर्दा, यसपटक साम्राज्ञीलाई हिट फिल्मको क्रेडिट लिने ठूलो अवसर थियो । 

तर, फिल्मको छायांकन र डबिङपछि उनले यो फिल्मलाई समय नै दिइनन् । फिल्मको प्रचारमा नायक दयाहाङ राई र नायिका मिरुना मगर मात्र देखिए । साम्राज्ञी प्रिमियरमा मात्र झुल्किइन् । 

यदि, यो फिल्मको प्रचारमा राम्रोसँग साथ दिएको भए फिल्म सफलताको क्रेडिट साम्राज्ञीलाई पनि जाने थियो । तर, अहिले फिल्म सफलताको क्रेडिट दया र मिरुनाको जोडीले लिइरहेको छ । 

साम्राज्ञीका लागि फिल्म क्षेत्रमा बलियो बन्नका लागि फिल्म चल्न आवश्यक छ । तर, चलेको फिल्मको पनि क्रेडिट लिन नसक्दा साम्राज्ञीले ठूलो अवसर गुमाएकी छिन् । 

दीपेन्द्र लामाको निर्देशनमा तयार भएको यो फिल्मले शुक्रबार र शनिबार मात्र १ करोड ६० लाखको ग्रस कलेक्शन गरेको छ ।