बैंकको सारथी बन्दै सेलिब्रेटी

कुनै पनि उत्पादनको बजार प्रवर्द्धनको माध्यम सेलिब्रेटी बनेका छन् भन्दा फरक नपर्ला । विज्ञापन होस् या ब्राण्डिङ जहीँतहीँ सेलिब्रेटीको उपस्थिति उल्लेख्य छ । 

बाटोमा हिँड्दा देखिने यो बैंकको डिजिटल विज्ञापन होस् या होर्डिङ बोर्ड, पम्पलेटमा यी सेलिब्रेटीको अनुहार प्रस्ट देख्न सकिन्छ । टेलिभिजन होस् या फिल्म हलमा आउने बैंकका विज्ञापनमा यी अनुहारलाई दर्शकले नियमित रूपमा हेरिरहेका छन् ।

एनआइसी एसिया बैंकको नारा ‘बैंक पनि साथी पनि, राम्रो पनि हाम्रो पनि’ नारा अधिकांश दर्शकको मुखमा झुन्डिएकै छ । यो बैंकको विज्ञापनमा राजेश हमाल, मनीषा कोइराला, दयाहाङ राई, केकी अधिकारीजस्ता फिल्म क्षेत्रका स्थापित नामको उपस्थितिले पनि बैंकलाई सर्वसाधारणमाझ पुग्नलाई सजिलो बनाइदिएको छ । 

दिग्गज कलाकार मदनकृष्ण श्रेष्ठ र हरिवंश आचार्य लामो समयदेखि सानिमा बैंकसँग सहकार्य गर्दै आएका छन् । बुझिए अनुसार मदनकृष्ण र हरिवंश सानिमा बैंकको शेयर होल्डरसमेत हुन् ।

गायक प्रकाश सपुतसँग २०७७ सालदेखि प्रभु बैंकले ब्राण्ड प्रवर्द्धनको सहकार्य गर्दै आएको छ । यो बैंकसँग अभिनेता प्रदीप खड्का पनि जोडिएका छन् । त्यस्तै अभिनेत्री जसिता गुरुङ पनि यो बैंकसँग जोडिएकी छिन् ।

यस्तै, हास्य कलाकार जितु नेपाल कृषि विकास बैंक र रेमिट्यान्स कम्पनी सिटी एक्सप्रेस मनी ट्रान्सफरको ब्राण्ड प्रवद्र्धनक हुन् । त्यस्तै, राष्ट्रिय आविष्कार केन्द्रका संस्थापक महावीर पुन नेपाल बैंकका ब्राण्ड एम्बासडर हुन् । गायिका अस्मिता अधिकारी राष्ट्रिय वाणिज्य बैंकको प्रवद्र्धनका रुपमासमेत कार्यरत छिन् । 

कलाकारद्वय दीपकराज गिरी र दीपाश्री निरौला लामो समयदेखि आइएमई समूहसँग जोडिएर समूहको बजार प्रवर्द्धन गरिरहेका छन् । उनीहरूसँगै यस बैंकको बजार प्रवर्द्धनमा चर्चित संगीतकार शम्भुजित बास्कोटा, अभिनेता रमेश उप्रेती र अभिनेत्री वर्षा सिवाकोटी पनि रहेका छन् ।

कलाकार सन्दीप क्षेत्री फोन पेको ब्राण्ड एम्बासडर हुन् । सन्दीप यसका अलावा थुप्रै बैंकको ब्राण्ड प्रवर्द्धनमा सहकार्य गरिरहेका छन् । उनी प्राय जहीँतहीँ देखिने गर्छन् ।

यस्तै, कामना सेवा विकास बैंकको नायक दिल श्रेष्ठ र कलाकर सोफी धरेल हालै सहकार्य सुरु गर्दै बैंकको ब्राण्ड प्रवर्द्धन गर्न थालेका छन् ।

त्यस्तै इ–सेवाको ब्राण्ड एम्बासडरमा विपिन कार्की र वर्षा राउत छन् भने, अभिनेत्री स्वस्तिमा खड्का, अभिनेता तथा निर्देशक निश्चल बस्नेत र कलाकार दिव्य देव पनि जोडिँदै आएका छन् ।

यसअघि राष्ट्रिय वाणिज्य बैंकको ब्राण्ड एम्बासडरका रूपमा ‘मिस नेपाल–२०१८’ विजेता श्रृङ्खला खतिवडा, ‘मिस नेपाल वर्ल्ड २०२२’ प्रियंकारानी जोशी, ‘मिस नेपाल वर्ल्ड २०२०’ नम्रता श्रेष्ठले काम गरिसकेका छन् ।

यता चर्चित हास्य कालाकार जोडी सीताराम कट्टेल ‘धुर्मुस’ र कुञ्जना घिमिरे 'सुन्तली' पनि मुक्तिनाथ विकास बैंकसँग बजार प्रवर्द्धनको सहकार्य गरिरहेका छन् ।

यसरी स्थापित बैंकहरुसँग जोडिन पाउँदा सेलिब्रेटीहरु खुसी देखिन्छन् । आफ्नो ब्राण्डलाई उपभोक्ता माझ अझ परिष्कृत रूपमा चिनाउन पनि बैंकहरुले सेलिब्रेटीलाई बजार प्रवद्र्धकका रूपमा राख्दा बैंकहरुले आफ्नो गरिमा बढेको महशुस गरिरहेका छन् ।