‘नाङ्गो गाउँ’को विकेन्ड कलेक्शनः १ करोड ६० लाख ग्रस

शुक्रबारदेखि रिलिजमा आएको फिल्म ‘नाङ्गो गाउँ’ले बक्स अफिसमा बम्पर सुरुवात गरेको छ । फिल्मले शुक्रबार र शनिबार दर्शकको ठूलो संख्यालाई हलमा तान्न सफल भएको हो । 

शुक्रबार यो फिल्मले बक्स अफिसमा ७० लाखको ग्रस कलेक्शन गरेको वितरक रोहित कट्टेलले जानकारी दिए । शुक्रबार ७० लाखको ग्रस कलेक्शन गरेको फिल्मले शनिबार देशभरका हलमा ९० लाखको ग्रस कलेक्शन गरेको हो ।

२ दिनमै फिल्मले बक्स अफिसमा १ करोड ६० लाखको ग्रस कलेक्शन गर्दै बम्पर सुरुवात गरेको हो । 

फिल्मले आज पनि राम्रो कलेक्शन गरिरहेको वितरक कट्टेलको भनाई छ । भोली तीजको बिदा र असोज ३ गते संविधान दिवसको बिदा परेकाले पनि फिल्मको व्यापारमा ठूलो प्रभाव पर्ने देखिन्छ । भोली तीजको बिदा परेकाले प्रदर्शकले फिल्मको शोज संख्या शुक्रबारको तुलानामा २५ प्रतिशतले बढाएका छन् । सोमबार यो फिल्मले नेपालभर १५० भन्दा बढी शोज पाएको छ । जसकाकारण, व्यापार फेरि आक्रामक हुने प्रक्षेपण गरिएको छ । 

दीपेन्द्र लामाको लेखन तथा निर्देशनमा तयार भएको यो फिल्ममा दयाहाङ राई, मिरुना मगर, शिशिर वाङ्देल, कर्मा, साम्राज्ञी राज्यलक्ष्मी शाह, बुद्दि तामाङ, रविन्द्र झा, विशाल पहारी लगायतका कलाकारको अभिनय छ । 

हिमाल कडरियाको प्रस्तुतिमा तयार भएको यो फिल्ममा राम श्रेष्ठको लगानी छ । रामहरि श्रेष्ठ कार्यकारी निर्माता रहेको फिल्मलाई आलोक शुक्लाले खिचेका हुन् ।