झरना भन्छिन्–‘बक्स अफिस भन्दा दर्शकको प्रतिक्रिया ठूलो’

शुक्रबारदेखि रिलिजमा आएको फिल्म ‘एक भागवत् र एक गीता’ले बक्स अफिसमा औषत सुरुवात गरेको छ । यो फिल्मलाई मिश्रित प्रतिक्रिया मिलिरहेको छ । लभ स्टोरी फिल्म निर्देशन गर्दै आएकी निर्देशक झरना थापाले यसपटक तेश्रो लिङ्गीको कथामा फिल्म बनाएकी छिन् । झरना आफ्नो सफ्ट केन्द्रबाट बाहिर निस्किएकी छिन् । 

फिल्मले तेश्रो लिङ्गीलाई समाजले हेर्ने नजरको कथा भनेको छ । साथमा, फिल्ममा नायक धिरज मगर र नायिका सुहाना थापाको प्रेमका कुरा पनि भनिएको छ । 

विपिन कार्कीलाई तेश्रो लिङ्गीको भूमिकामा प्रस्तुत गरिएको फिल्मलाई सुनिल कुमार थापाले निर्माण गरेका हुन् । फिल्मको व्यापारको बिषयमा झरना भन्छिन्–‘अब, बक्स अफिसमा के होला भन्ने कुराले मलाई खासै अर्थ राख्दैनँ । मलाई दर्शकको राम्रो प्रतिक्रिया नै ठूलो कुरा हो ।’

झरनाले यसपटक फरक कथा रोज्नुको बारेमा भनिन्–‘मलाई जहिले पनि लभ स्टोरी कथामा मात्र फिल्म बनाएको भन्ने आरोप आउने गरेको थियो । यति चलेको व्यानरले अब त केही फरक गर्नुपर्छ भन्ने प्रतिक्रिया पनि धेरैले दिनु भएको थियो । यसैले, यसपटक आफूले बनाइरहेको कथाबाट पर हटेर यो फिल्म बनाएको हुँ ।’