‘एक भागवत् र एक गीता’: समाजले नदेखेको कथामा नयाँ बहस

आजबाट रिलिजमा आएको फिल्म ‘एक भागवत् र एक गीता’को काठमाडौंको बीग मुभिजमा विशेष शोको आयोजना गरिएको छ । फिल्मकर्मी, पत्रकारहरुको बाक्लो उपस्थितीमा आयोजित विशेष शोबाट निर्माणपक्षले उत्कृष्ट  प्रतिक्रिया पाएको छ । 

फिल्म हेर्न पुगेका निर्माता तथा निर्देशक आकाश अधिकारी, कलाकार किरण केसी लगायतले यसले नयाँ बिषयमा बहस सुरु गरेको बताए । उनीहरुले, यस्तो कथा भन्नका लागि निर्मातामा आँट हुनुपर्ने भन्दै सुनिलकुमार थापाको प्रशंसा गरे । 

झरना थापाको निर्देशनमा तयार भएको यो फिल्मले तेश्रो लिङ्गीको कथा भन्छ । समाजले नै देखेर पनि नदेखेको जस्तो गर्ने पात्रहरुको कथालाई झरनाले गज्जब तरिकाले भनेकी छिन् । फिल्मको पहिलो भाग औषत छ । दोश्रो भागले भने दर्शकलाई थुप्रै ठाउँमा भावुक बनाउँछ, कैयौं ठाउँमा सोच्न वाध्य बनाउँछ । 

विपिन कार्की, सुहाना थापा, धिरज मगर, कविर खड्काको अभिनय उत्कृष्ट छ । बाल–कलाकारको रुपमा देखिएका जेभिन र जेभिस श्रेष्ठले गज्जबको काम गरेका छन् । 

यसअघि रोमान्टिक फिल्म निर्देशन गर्दै आएकी झरनाले यसपटक फिल्ममा रोमान्स भन्दा बढी गम्भिर बिषयलाई प्राथमिकता दिएकी छिन् । 

फिल्म हेरेपछि नायक धिरज मगरले भने–‘मैले पनि आज पहिलो पटक फिल्म हेर्न पाएँ । फिल्मले भन्न खोजेको कथाले दर्शकको मन छुन्छ जस्तो लाग्छ । यसको ब्याग्राउन्ड स्कोर, विपिन दाई, सुहाना लगायतको अभिनय बेजोड छ । यो फिल्ममा काम गर्न पाएकोमा खुशी छु ।’

निर्देशक झरना थापाले फिल्मको बक्स अफिस भन्दा पनि दर्शकले दिने प्रतिक्रिया आफ्ना लागि महत्वपूर्ण हुने बताइन् । उनले, यसपटक आफूले केही फरक कथा भन्न खोजेकाले डर लागेको भन्दै विशेष शोपछि पाएको प्रतिक्रियाले उत्साहित भएको बताइन् । निर्माता सुनिल कुमार थापाले फिल्मले आज औषत व्यापार गरेको भन्दै भोलीबाट बलियो वर्ड अफ माउथका कारण दर्शक बढ्ने अपेक्षा गरे ।