‘फर्कि फर्कि’को फस्टलुक भिडियोः आफैसँग अलमलमा परेका अनमोल

नायक अनमोल केसी र नायिका जसिता गुरुङको मुख्य भूमिका रहेको फिल्म ‘फर्कि फर्कि’को फस्टलुक भिडियो सार्वजनिक गरिएको छ । फिल्मको छायांकन सुरु नहुँदै यसको निर्माणपक्षले टिजर सार्वजनिक गरेर फिल्म निर्माणको घोषणा गरेको हो । 

फिल्मको फस्टलुक भिडियोमा नायक अनमोल केसीलाई फिचर गरिएको छ । आफैसँग अलमलमा परेका अनमोल केसीको सपना र विपनाको कथामा यो फिल्म बन्ने फस्टलुक भिडियोबाट थाहा हुन्छ । 

सुयोग गुरुङको निर्देशनमा बन्ने फिल्ममा रोहित अधिकारी र ओम अग्रवालको लगानी रहनेछ । सुयोगकै कथा तथा पटकथा रहेको यो फिल्ममा मनोज ओली र रामु न्यौपाने सह–निर्माता, आलोक शुक्लाको छायांकन रहनेछ । 

यो फिल्मको छायांकन तिहारको लक्ष्मीपूजाबाट सुरु गर्ने योजनामा निर्माता अधिकारी छन् । नायक अनमोल केसीले यो फिल्मको छायांकन अगाडि सुदर्शन थापाको निर्देशनमा बन्न लागेको फिल्म ‘रावायण’का लागि समय दिएका छन् ।