मिरुनालाई छैन ह्याट्रिकको लोभ

नायिका मिरुना मगरको करिअरको सुरुवात सुखद हुन सकेन । तर, फिल्म ‘कबड्डी ४’मा काम गरेपछि भने मिरुनालाई लक लागिरहेको छ । उनले अभिनय गरेका फिल्मले व्यापारिक रेकर्ड मात्र बनाएका छैनन्, उनलाई फिल्म अफरको पनि लाइन छ । 

उनै, मिरुना अभिनित फिल्म ‘नाङ्गो गाउँ’ भदौको २९ गतेबाट नेपालभर रिलिज हुँदैछ । राजनीतिक कथामा निर्माण हुन लागेको यो फिल्ममा मिरुना दयाहाङ राइको जोडीको रुपमा देखिदैछिन् । मिरुनाले बोलेका केही फिल्मका संवादहरु सामाजिक संजालमा भाइरल छन् । 

यदि, यो फिल्म चलेको खण्डमा मिरुनाले सफलताको ह्याट्रिक गर्नेछिन् । यतिमात्र होइन, नायक दयाहाङ राइसँग पनि उनको सफलताको ह्याट्रिक हुनेछ । मिरुनाको यसअघि ‘कबड्डी ४ र जारी’ ब्लकबस्टर भैसकेका छन् । 

तर, मिरुनाले आफूलाई सफलताको ह्याट्रिकको लोभ नभएको बताएकी छिन् । उनले, एउटा कलाकारले यस्तो कुरा सोचेर काम गर्दा उत्कृष्ट काम गर्न नसक्ने पनि बताइन् । 

मिरुनाले, फिल्ममा काम गर्दा आफूले कहिले पनि सफल होला या नहोला भनेर काम नगर्ने तर्क गरिन् । उनले, फिल्ममा आफूलाई दिइएको भूमिकालाई राम्रोसँग निर्वाह गर्न आफू केन्द्रित हुने उनको भनाई छ । 

मिरुनाले ‘नाङ्गो गाउँ’ले सामाजिक कथालाई राम्रोसँग प्रस्तुत गरेको बताइन् । दीपेन्द्र लामाको निर्देशनमा बनेको फिल्मलाई दर्शकले मन पराउने उनको विश्वास छ ।