‘फर्कि फर्कि’को टिजरको छायांकन, अनमोल केसी मात्र देखिने

रोहित अधिकारी फिल्मस्को व्यानरमा निर्माण हुन लागेको फिल्म ‘फर्कि फर्कि’को टिजरको छायांकन गरिएको छ । फिल्मको छायांकन सुरु हुनु अगाडि नै यसको टिजरको मात्र छायांकन गरिएको हो । शनिबार रातभर यो फिल्मको टिजर खिचिएको निर्माता रोहित अधिकारीले बताए । 

सुयोग गुुरुङको निर्देशनमा तयार हुन लागेको लभ स्टोरी फिल्मको छायांकन कहिले सुरु हुन्छ, त्यो खुलेको छैन । तर, निर्माता अधिकारीका अनुसार टिजरमै फिल्मको छायांकन मिति भने घोषणा हुनेछ । 

टिजरमा नायक अनमोल केसीलाई मात्र देखाइनेछ । फिल्ममा अनमोलको जोडीको रुपमा नायिका जसिता गुरुङको मुख्य भूमिका रहनेछ । तर, शनिबार अनमोललाई मात्र प्रस्तुत गर्ने गरि निर्माणपक्षले टिजर खिचेको हो । 

फिल्म ‘छड्के २’को छायांकनपछि अनमोलले शनिबार कुनै फिल्मको छायांकनका लागि टेक दिएका छन् । यो फिल्मलाई लिएर नायक केसी निकै उत्साहित छन् । अनमोलले ‘फर्कि फर्कि’को काम सुरु गर्नु अगाडि सुदर्शन थापाको निर्देशनमा बन्न लागेको फिल्म ‘रावायण’मा काम गर्नेछन् । अहिले यो फिल्मको टिम लोकेशन खोजीमा काठमाडौं बाहिर छ । 

निर्माता रोहित अधिकारीले यो बर्ष ३ वटा फिल्म निर्माणको घोषणा गरिसकेका छन् । जसमा ‘बरिष्ठ बलराम, फर्कि फर्कि र एक अनटाइटल प्रोजेक्ट’ छ ।