‘एक भगवत् गीता’को ट्रेलर रिलिज

झरना थापाको निर्देशनमा सुहाना थापाको कन्सेप्ट रहेको फिल्म ‘एक भगवत् गीता’को ट्रेलर आज सार्वजनिक भएको छ । आज आयोजित कार्यक्रममा केही फरक कथा बोकेको यो सामाजिक तथा प्रेम कथामा आधारित फिल्मको ट्रेलर रिलिज भयो । 

ट्रेलरमा नायक विपिन कार्कीलाई तेश्रो लिङ्गीको भूमिकामा देखाइएको छ । विपिनको भूमिकालाई नै मुख्य केन्द्रमा राखेर यसको ट्रेलर तयार पारिएको हो । 

सुनिल कुमार थापाको निर्माणमा तयार भएको फिल्ममा विपिन कार्की, धिरज मगर, सुहाना थापा मुख्य भूमिकामा छन् । साथमा बालकलाकार जेभिन र जेविस पौडेल फिल्ममा मुख्य भूमिकामा छन् । फिल्ममा कविर खड्का, संजोग रसाइली, अनुराग कुँवर, रेयर राई, आयुष्मान ठकुर लगायतका कलाकारको मुख्य भूमिका छ । 

यो फिल्ममा झरना थापाको कथा, झरना थापा, परिच्छेद सेन, पुरुषोत्तम ढुंगेल, सरिन पोखरेलको पटकथा छ । यस्तै, फिल्ममा परिच्छेद  सेन, पुरुषोत्तम ढुंगेल, सरिन पोखरेलको संवाद छ । 

यो फिल्ममा राजेश श्रेष्ठको छायांकन, मित्र डी गुरुङको सम्पादन, हर्कुलस बस्नेत, आशिष अविरल, बाबुल गिरी र प्रवेश मलिकको संगीत छ । फिल्मका गीतको भिडियोमा कविराज गहतराजको कोरियोग्राफी छ । 

फिल्म ‘एक भगवत् गीता’ले समाजमा हरेक मानिस बराबर हुन् भन्ने कथालाई देखाउन खोजेको छ ।