‘ऐँचो पैँचो’मा वर्षा र सुशिलको उत्कृष्ट काम

आजबाट रिलिजमा आएको फिल्म ‘ऐँचो पैँचो’ले बक्स अफिसमा औषत सुरुवात गरेको छ । यसको दिवा शो सम्म ७ प्रतिशतको अकुपेन्सी छ । 

फिल्मको प्रिमियरमा यसका २ कलाकार वर्षा राउत र सुशिल सिटौलाको कामको प्रशंसा भयो । फिल्म हेर्न पुगेका निर्देशक दीपेन्द्र के खनालले मेरो फिल्मसँग भने–‘मलाई वर्षा र सुशिलको अभिनयले मन छोयो । दुबैले गज्जबको काम गरेका छन् । सुशिलले कतिपय दृश्यमा त मन नै चसक्क बनाउँछन् । वर्षाले पनि नसोचेको काम गरेकी छिन् ।’

फिल्म हेरेका अधिकांश पत्रकार र फिल्मीकर्मीले पनि फिल्मले उठाउन खोजेको बिषयवस्तुलाई मन पराएका थिए । उनीहरुले, फिल्ममा वर्षा र सुशिलले उत्कृष्ट काम गरेको भन्दै सरप्राइज भएको बताए । 

वर्षाले अभिनय गरेका फिल्मबाट उनको चर्चा भएपनि, अभिनयको चर्चा भने खासै भएको थिएन । तर, यसपटक भने वर्षाले चुलबुले क्यारेक्टरलाई छाडेर गम्भिर भूमिकामा आफूलाई सशक्त रुपमा प्रस्तुत गरेकी छिन् । फिल्मभरी नै हाबी भएकी वर्षाले फिल्ममा दर्शक वाध्न महत्वपूर्ण भूमिका निर्वाह गरेकी छिन् । 

फिल्मको पहिलो हाफमा हाबी भएका सुशिलको कामले पनि दर्शकको मन छुन्छ । सुशिलले दर्शकलाई हसाँउने मात्र होइन, अभिनयका कारण धुरुक्कै रुवाउँछन् पनि । 

कृषा चौलागाँइले निर्देशन गरेको फिल्मले प्रिमियरमा औषत प्रतिक्रिया पाएको छ ।