सलोनका लागि झुल्किएका सलिन

फिल्म ‘ए मेरो हजुर २ र यात्रा’मा काम गरेपछि नायक सलिनमान बनियाँ नेपाली फिल्म क्षेत्रको स्टार बने । उनलाई लिएर फिल्म खेलाउन निर्माताहरुले पनि चासो दिए । तर, फिल्म क्षेत्रको मोहले सलिनलाई भने तान्न सकेन । 

सलिनमानले फिल्म नखेलेको केही बर्ष भैसकेको छ । उनले, अब फिल्म खेल्छन् या खेल्दैनन् भन्ने पनि पक्का छैन । सलिनमान आफ्नै दुनियाँमा मस्त छन् । 

फिल्मको कार्यक्रममा पनि सलिनलाई देख्न कमै मात्र पाइन्छ । तर, उनी आफ्ना नजिकका साथी सलोन बस्नेतका लागि भने सधै अगाडि आउँछन् । सलिनलाई सलोनको बिहे र पार्टीमा मिडियाले क्यामेरामा कैद गरेका थिए । उनै, सलिन बुधबार आयोजना भएको फिल्म ‘जय हो’को प्रिमियर कार्यक्रममा भेटिए । 

सलिनसँग फिल्म ‘ए मेरो हजुर २’का निर्माता सुनिल कुमार थापाले लामो गफ गरेका थिए । सलिनले सलोनलाई भने सधै नै साथ दिदै आएका छन् । तर, फिल्म खेल्ने बिषयमा भने उनको फरक भनाई छ । आफूलाई फिल्म क्षेत्रले बिर्सिएको उनको भनाई छ । 

सलिनले डेब्यू फिल्ममा काम गर्दा नै फिल्ममा काम गर्दाको गाह्रो अवस्था वुझेका थिए । उनले फिल्म ‘यात्रा’का लागि भने निकै मिहिनेत पनि गरेका थिए । तर, यो फिल्म बक्स अफिसमा नचलेपछि सलिन केही निराश देखिएका थिए ।