वर्षालाई ‘एैँचो पैँचो’ले दिएको सन्तुष्टी

फिल्म ‘नाई नभन्नु ल ४’बाट नेपाली रजतपटमा प्रबेश गरेकी नायिका वर्षा राउतले अभिनय गरेको पछिल्लो फिल्म ‘एैँचो पैँचो’ भदौको १४ गतेबाट रिलिज हुँदैछ । 

वर्षाले करिअरमा ‘छक्का पन्जा, छक्का पन्जा २, नाई नभन्नु ल ५, चौका दाउँ, जात्रा, जात्रै जात्रा, के घर के डेरा’ लगायतका फिल्ममा अभिनय गरेकी छिन् । यी फिल्ममा वर्षाको भूमिका उनले अपेक्षा गरे अनुसार थिएन । अधिकांश फिल्ममा फेरि धेरै कलाकार भएका कारण पनि वर्षालाई दर्शकले धेरै नोटिस गरेनन् । 

यसपटक भने फिल्म ‘एैँचो पैँचो’बाट उनी सन्तुष्ट छिन् । वर्षा भन्छिन्–‘यसपटक मैले अघिल्ला फिल्मको भन्दा बढी स्पेश पनि पाएको छु । साथमा, यसपटक आफ्नो काम देखाउने मौका पनि पाएकी छु कि भन्ने लाग्छ । यसैले, यसपटक दर्शकको प्रतिक्रिया पनि राम्रो आउँछ भन्नेमा आश छ ।’

वर्षाले आफूलाई फिल्मका छायांकार पुरुषोत्तम प्रधान, निर्देशक कृषा चौलागाँइले पनि राम्रो प्रतिक्रिया दिएकाले अझै आशा बढेको बताइन् । 

वर्षा भन्छिन्–‘यसमा पनि केही कमिकमजोरी त होलान् । आउँदो फिल्ममा अझै त्यसलाई सुधार गर्नेछु । तर, मैले आफूलाई पनि केही हदसम्म सन्तुष्ट हुने गरि यो फिल्ममा काम गरेकी छु भन्ने लाग्छ ।’