आफू ‘अभागी हिरो’ भएको सुशिलको स्विकारोक्ती

नायक सुशिल सिटौलाको फिल्म जसले हेर्छ, उसले उनको अभिनयको प्रशंसा गर्छ । फिल्म क्षेत्रमा ‘होस्टेल रिटन्र्स’बाट प्रवेश गरेका सुशिलले यसपछि केही फिल्ममा अभिनय गरेका छन् । उनले अभिनय गरेको फिल्म ‘जुलेबी’ गत साता रिलिज भएको थियो, तर हलमा एक साता पनि टिक्न सकेन । यो फिल्म हेर्नेले सुशिलको कामको प्रशंसा गरे । 

सुशिलको कामको प्रशंसा ‘रणवीर’मा पनि भएको थियो । तर, यो फिल्म पनि बक्स अफिसमा सफल भएन ।  सुशिललाई केही समय अगाडि मेरो फिल्मले राम्रो अभिनय गर्ने ‘अभागी हिरो’को ट्याग दिएको थियो । सुशिलले यो कुरा स्विकार गरेका छन् । तर, आफू आफ्नो कामबाट सन्तुष्ट रहेको सुशिलको भनाई छ । 

सुशिलले मेरो फिल्मसँग कुरा गर्दै भने–‘मैले जति पनि काम गरेको छु, त्यसबाट म सन्तुष्ट छु । मैले केही नयाँ कुरा सिक्न पाएको छु । मैले भोलीको दिनमा के होला भनेर कहिले पनि सोचेको छैनँ । सधै नयाँ नयाँ भूमिका गर्ने उत्सुकता म भित्र छ ।’

सुशिल अभिनित फिल्म ‘एैँचो पैँचो’ भदौको १४ गतेबाट रिलिजमा आउँदैछ । यो फिल्ममा आफूलाई भिन्न रुपमा दर्शकले हेर्न पाउने उनको भनाई छ । सुशिलले आफू कम बोल्ने व्यक्ति भएको बताए ।