यस्तो छ सारुकले अभिनय गरेको अन्तिम गीतको भिडियो

नायक सारुक ताम्राकारले अभिनय गरेको अन्तिम गीत ‘माया’ सार्वजनिक गरिएको छ । आज काठमाडौंमा आयोजित पत्रकार सम्मेलनमा फिल्म ‘ह्यासट्याग माया’का केही दृश्यहरु समावेश गरिएको गीत सार्वजनिक गरिएको हो । यो फिल्म भने अब निर्माण नहुने भएको छ । 

यो गीतमा एसडी योगीको स्वर, राम अविरल बिष्टको शब्द र एसडीकै संगीत छ । यो फिल्मको छायांकनकै क्रममा नायक सारुक ताम्राकारले असारको २१ गते आफ्नै घरमा आत्महत्या गरेका थिए । 

यो गीतको भिडियोमा सारुकसँगै निकिता आचार्य, महेश मगर, सागर परियारलाई हेर्न सकिन्छ । राजिब गुरुङको कथा र निर्देशनमा तयार भएको भिडियोमा उज्जवल जोशीको छायांकन छ । शर्मिला थापाले यो गीतको निर्माण गरेकी हुन् । 

भिडियोमा सारुक र निकिताबिचको केमेष्ट्री प्रस्तुत गरिएको छ । साथै, फिल्मको छायांकनका क्रममा केही दृश्य पनि भिडियोमा समावेश गरिएको छ ।