सुरु भयो ‘उपहार’को छायांकन, रेखा, पूजा र बेनिशाले गरे पुजा

नायिका रेखा थापाको निर्माणमा तयार हुन लागेको फिल्म ‘उपहार’को छायांकन सुरु भएको छ । बिहिबार बिहान पशुपतिमा क्यामेरा पूजा गर्दै छायांकन सुरु गरिएको रेखाले जानकारी दिएकी छिन् । 

शुभसाइत समारोहमा फिल्मका मुख्य कलाकारहरु सबै उपस्थित थिए । यो फिल्ममा रेखा थापा, पूजा शर्मा, बेनिशा हमाल, मुकुन भुषाल, तेज गिरी, समर्पण कार्की, शिशिर राणा लगायतका कलाकारको मुख्य भूमिका हुनेछ । यो फिल्मको छायांकन ४० दिनमा सक्ने योजना निर्माणपक्षको छ । फिल्मको आज त्रिभुवन विमानस्थल अगाडिको दृश्य पनि छायांकन गरिएको छ । 

ज्ञानेन्द्र देउजाको लेखन तथा निर्देशनमा तयार हुन लागेको फिल्मले तीन महिला पात्रको कथालाई प्रस्तुत गर्नेछ । 

अर्जुन पोखरेल र बाबुल गिरीको संगीत रहेको फिल्ममा विष्णु कल्पितको छायांकन रहनेछ । कविराज गहतराजले गीतका भिडियोको कोरियोग्राफी गर्नेछन् ।