‘पशुपति प्रसाद २ः भष्मे डन’: यस्तो पो टिजर

नेपाली फिल्महरुको जुन शैलीमा टिजर सार्वजनिक हुँदै आएको थियो, त्यो भन्दा विल्कुलै फरक शैलीमा कार्तिकको ४ गतेबाट रिलिज हुन लागेको फिल्म ‘पशुपति प्रसाद २ः भष्मे डन’को टिजर सार्वजनिक भएको छ । फिल्मका मुख्य पात्र विपिन कार्कीको जन्मदिनको अवसर पारेर टिजर सार्वजनिक गरिएको हो ।

टिजरमा नायक विपिन कार्कीको पात्र झलक देखाइएको छ । उनी सुनै सुनको दात राखेर दर्शकमाझ प्रस्तुत भएका छन् । पशुपति क्षेत्रमा रहँदै आएका पशुपति प्रसादको निधनपछि आफ्नो अस्तित्व स्थापित गर्नका लागि संघर्ष गरिरहेका ‘भष्मे डन’माथि यो फिल्म तयार भएको छ ।

दीपेन्द्र के खनालको निर्देशनमा तयार भएको फिल्मको टिजरले दर्शकमा फिल्मप्रति निकै ठूलो उत्साह थप्ने देखिएको छ । निर्माणपक्षले वान सर्ट दृश्यमा फिल्मको टिजर तयार पारेको छ । जसको प्रस्तुतिले पनि झनै उत्सुकता बढाएको छ । 

खगेन्द्र लामिछानेको लेखन तथा निर्देशनमा तयार भएको यो फिल्ममा स्वस्तिमा खड्का, सौगात मल्ल, रविन्द्र सिंह बानियाँ, माओत्से गुरुङ, प्रकाश घिमिरे, लोकेन्द्र लेखक, मिस्श्री थापा, सजन थापा मगर, विभु पौडेल, प्रकाश दाहाल लगायतका कलाकारको अभिनय छ ।

फिल्मका निर्देशक खनालले यसपटक सिक्वेल अर्थपूर्ण रुपमा तयार भएको बताए । टुकी आर्टस्को ब्यानरमा निर्माण भएको फिल्मले बक्स अफिसमा बम्पर व्यापार गर्ने संकेत दिएको छ ।