सारुकको फिल्म ‘ह्यासट्याग माया’ अब म्यूजिक भिडियो

नायक सारुक ताम्राकारको अन्तिम फिल्म ‘ह्यासट्याग माया’लाई म्युजिक भिडियोको रुपमा सार्वजनिक गर्ने तयारी यसको निर्माण पक्षले गरेको छ । बिहीबार काठमाडौंमा एक कार्यक्रमको आयोजना गर्दै सारुक अभिनित फिल्मका दृश्य समावेश गरेर भिडियो सार्वजनिक गर्ने तयारी गरिएको हो ।

फिल्मका प्रोडक्शन डिजाइनर अरुण रेग्मीले मेरो फिल्मलाई दिएको जानकारी अनुसार सारुकले अभिनय गरेका दृश्यहरुलाई समावेश गरेर भिडियो सार्वजनिक गर्ने तयारी गरिएको हो ।

यो गीतमा फिल्मकी नायिका नम्रता श्रेष्ठलाई पनि प्रस्तुत गरिने छैन । सारुकसँगै काम गरेकी फिल्मकी अर्की एक नायिका र सारुकको दृश्य मात्र गीतमा समावेश गरिएको छ ।

सारुकलाई अन्तिम श्रद्धाञ्जली दिन र उनको कामलाई दर्शकमाझ ल्याउन फिल्मको निर्माण पक्षले यस्तो तयारी गरेको हो । फिल्मकै गीतलाई अब म्युजिक भिडियोको रुपमा प्रस्तुत गर्ने तयारी गरिएको हो ।

असारको २१ गते आफ्नै घरमा झुन्डिएर आत्महत्या गरेका सारुकले फिल्म ‘ह्यासट्याग माया’मा काम गरिरहेका थिए । तर, फिल्मको छायांकन हुँदा हुँदै सारुकको निधन भएपछि यो प्रोजेक्ट रोकिएको छ । निर्माण पक्षले भिडियो सार्वजनिक गर्दै दर्शकमाझ सारुकको कामलाई ल्याउने तयारी गरेको हो । फिल्म भने अब नबन्ने भएको छ ।