‘गणपति’ले मुकुनमा बढाएको आशा, ‘उन भित्र’ गीत चल्दा दंग बाबुल

भदौको १४ गतेबाट फिल्म ‘गणपति’ रिलिज हुँदैछ । यो फिल्ममा मुकुन भुषाल र मेनुका प्रधान मुख्य भूमिकामा छन् । सविन अधिकारीको निर्देशनमा तयार भएको यो फिल्मलाई रामप्रसाद रिजालले निर्माण गरेका हुन् । 

यो फिल्मको ट्रेलर सार्वजनिक भएपछि यसको चर्चा पनि चुलिएको छ । ट्रेलर हेर्ने फिल्मीकर्मी र दर्शकले यसले उठान गरेको बिषयवस्तु फरक रहेको बताइरहको छन् । 

दर्शकमा फिल्मप्रति आशा बढेपछि यसका मुख्य कलाकार मुकुन भुषालमा पनि आशा बढेको छ । फिल्मको शिर्ष भूमिकामा देखिएकाले पनि मुकुनका लागि यो फिल्म विशेष छ । फिल्मका लागि निकै मिहिनेत गरेका मुकुन दर्शकका लागि यो फिल्म विशेष स्वादको रहेको बताउँछन् । 

फिल्म ‘बुलबुल’मा काम गरेपछि मुकुनको चर्चा चुलिएको हो । उनको यही दिन फिल्म ‘एैँचो पैँचो’ पनि रिलिज हुँदैछ । दुबै फिल्म चलेको खण्डमा मुकुनको माग फिल्म क्षेत्रमा झनै बढ्नेछ । 

मुकुनको हातमा ‘उपहार र ज्वाँई साब’ छ । उनी अभिनित फिल्म ‘बिच्छेद’ पनि मंसिरमा रिलिज हुँदैछ । फिल्म ‘गणपति’लाई लिएर मुकुनको उत्साह बढिरहँदा यो फिल्मका संगीतकार तथा गायक बाबुल गिरी झनै उत्साहित छन् ।

उनले स्वर भरेको ‘उन भित्र’ बोलको गीतको छोटो अंश ट्रेलरमा समावेश गरिएको थियो । सोही अंश सामाजिक संजालमा हिट हुँदा बाबुल दंग छन् । गीतलाई शंकर अधिकारी ‘घायल’ले लेखेका हुन् । 

एकातिर ट्रेलरले चर्चा पाउनु, अर्कोतिर सार्वजनिक गीतको छोटो अंश नै हिट हुनुले पनि निर्माणपक्षमा फिल्मलाई लिएर आशा र उत्साह बढेको हो ।