विपिनका दुई फिल्मका २ गेटअपले बढाएको अपेक्षा

अभिनेता विपिन कार्की भर्सटायल कलाकार हुन् भन्ने कुरामा त दुईमत छैन । नेपाली फिल्म क्षेत्रमा विपिनले अभिनयको माध्यमबाट आम मानिसहरूको मन जितिसकेका छन् । विपिनमा अनेक छन् । उनमा अनेक पात्र र प्रवृत्तिमा रुपान्तरण हुन्छ । यस्ता अभिनेता जो फिल्ममा आफूलाई लुकाउँछन् र पात्रको चरीत्रलाई ‘हिट’ बनाइदिन्छन् । 

उनले जे–जति चरित्र निर्माण र निर्वाह गरे सम्झनलायक रहेका छन् । आफूलाई लुकाएर विपिनले यस्ता चरित्र निर्माण तथा निर्वाह गरेका छन् । यसैले त, फरक अभिनयका लागि फिल्म मेकरले पनि विपिनलाई नै सम्झन्छन् । 

उनी यस्ता अभिनेता हुन् जब कुनै पनि फिल्मको स्क्रिप्ट उनको हातमा पर्छ, त्यही बेलादेखि उनी शारीरिक÷मानसिक रूपमा आफूलाई फिल्मी चरित्रमा ढाल्न थाल्छन् । यस्तो अवस्थामा उनी विपिन कार्कीबाट क्रमशः अर्को व्यक्तिमा रुपान्तरण भएको स्पष्ट भान हुन्छ ।

उनै, विपिनको २ महिनाको अन्तरमा दुई फिल्म रिलिज हुँदै छन् । संयोग नै मान्नुपर्छ, यी दुबै फिल्मको फस्टलुक हिजो सार्वजनिक गरियो । 

सुनिलकुमार थापाको निर्माणमा झरना थापाले निर्देशन गरेको फिल्म ‘एक भगवत् गीता’का फरक फरक आधा दर्जन पोस्टर सार्वजनिक भए । जसमा विपिन कार्की, सुहाना थापा र धिरज मगरलाई स्थान दिइएको छ । तर, अधिकांश दर्शकको ध्यान विपिनको ट्रान्सजेन्डर गेटअप समावेश पोष्टरमा परेको छ । विपिनले यो फिल्ममा सुहाना थापाको रक्षकको रुपमा काम गरेको वुझ्न सकिन्छ । यो फिल्म भदौको २९ गतेबाट रिलिज हुँदैछ । 

यस्तै, हिजो नै यो वर्षको अर्को प्रतिक्षित फिल्म ‘पशुपति प्रसाद २ः भष्मे डन’को दुईवटा फरक पोस्टर सार्वजनिक भयो । जसमा, विपिन कार्कीको ‘भष्मे डन’ अवतार हेर्न सकिन्छ । फिल्मको पोष्टरमा विपिनको गेटअप आम दर्शकका लागि नयाँ होइन । किनकी, उनले फिल्म ‘पशुपति प्रसाद’मै भष्मे डनको भूमिकामा काम गरिसकेका छन् । तर, यसपटक विपिनको भूमिकालाई निर्देशक दीपेन्द्र के खनालले कसरी नयाँपन दिएका छन् भन्ने कुरामा दर्शकको ध्यान छ । यो फिल्म भने दशैँको अवसरमा कार्तिक ४ गतेबाट रिलिज हुँदैछ । 

विपिन कार्कीका लागि २ महिनाको अन्तरमा दुई फिल्मबाट आम दर्शकको मन जित्ने अवसर फेरि आएको छ । यो वर्ष फिल्म ‘प्रसाद २’बाट व्यहोरेको असफलता विपिनका लागि दुखद साबित भएको थियो । तर, हिजो सार्वजनिक भएका दुई फिल्मका २ पोस्टरले विपिन कार्कीको अब्बलता फेरि पनि पुष्टि गरेको छ । मेकरका लागि फिल्म प्रचारको बलियो पाटो विपिनको भूमिका र उनको गेटअप बन्ने पक्का छ ।