नेपालमा ‘गदर २ र ओ माई गड २’को सुखद कमाई

गत शुक्रबारबाट नेपालमा तीन फिल्म प्रदर्शनमा आए । जसमा दक्षिण भारतका सुपरस्टार रजनीकान्त अभितित फिल्म ‘जेलर’, बलिउडका दुई फिल्म ‘गदर २ र ओएमजी २’ थिए । यी फिल्महरु नेपालमा दोश्रो सातामा पनि सुखद प्रदर्शन गर्ने तयारीमा देखिएका छन् । अगस्त १० बाट रिलिज भएको फिल्म ‘जेलर’ले घरेलु बक्स अफिसमा धेरै रेकर्डहरू बनाउँदै २ सय करोडको क्लबमा प्रवेश गरिसकेको छ ।

विश्व बजारमा भने फिल्म ४ सय करोड कमाउने दौडमा छ । तर यो फिल्मले नेपालका दर्शकमा खासै कमाल देखाउन सकेन । यसले नेपाली बक्सअफिसमा सोचे अनुरुपको व्यापार गर्न नसकेको बक्स अफिस रिपोर्टबाट देख्न सकिन्छ । बक्सअफिस रिपोर्टका अनुसार नेपालमा ‘जेलर’ले ३८ लाख ३८ हजार को व्यापार गरेको छ । फिल्म ‘गदर २’ले भने नेपाली बक्स अफिसमा पनि आक्रामक कमाई गरिरहेको छ । भारतीय बक्स अफिसमा यो फिल्मले ५ दिनको लामो विकेन्डमा बम्पर व्यापार गर्दै २ सय करोड बढी कमाएको थियो ।

यसले नेपाली बजारमा २ करोड ६८ लाख भन्दा बढीको कमाई गरिसकेको छ । दोश्रो सातामा पनि फिल्मका उच्च डिमाण्ड रहेकाले व्यापार अझै आक्रामक हुन सक्ने प्रक्षेपण गर्न सकिन्छ । यस्तै, शुक्रबारदेखि नै रिलिजमा आएको फिल्म ‘ओ माई गड २’ले पनि बक्स अफिसमा सुखद कमाई गरिरहेको छ । नेपालमा यसले १ करोड २५ लाख भन्दा माथिको व्यापार गरिसकेको छ । 

विशेषगरि, ‘गदर २ र ओ माई गड २’को वर्ड अफ माउथ उच्च छ । यसैले, नेपाली बक्स अफिसमा यी दुबै फिल्मले भोलीबाट रिलिज हुन लागेका २ नेपाली फिल्मलाई समेत नराम्रोसँग प्रभावित बनाएका छन् ।