कामिनोमा प्रदीपको जोडी आना

करिब ६ महिना अघिदेखि निर्माण हुने भनिएको फिल्म ‘कामिनो’ अहिलेसम्म सुटिङमा जान सकेको छैन । यो बीचमा फिल्ममा अनुबन्धित भएका कलाकारहरुले फिल्म छाडेका कुरामात्र बाहिरिए । तर फिल्मको काम चाहिँ अगाडि बढ्न सकेको छैन । 

यसअघि यसै फिल्ममा प्रमुख अभिनेत्रीका रुपमा अनुबन्धित भएकी निती शाहले पनि फिल्म नबन्ने भएपछि हात झिकेकी छन् । उनी अहिले सुदर्शन थापाको फिल्म ‘रावायण’मा अनुबन्धित भइसकेकी छन् ।

मेरोफिल्मलाई प्राप्त सूचना अनुसार ‘कामिनो’ मा नायिका आना शर्मालाई मुख्य अभिनेत्रीका रुपमा अनुबन्धित गरिएको जानकारी भएको छ । केही दिन अघिमात्र नितीले छाड्नासाथ आनालाई फिल्ममा भित्र्याइएको बताइएको छ ।

यो फिल्ममा अभिनेता प्रदीप खड्का र आनाको पहिलो सहकार्य हुने भएको छ । फिल्ममा दीपक वलीको निर्देशन हुनेछ । फिल्ममा महेश दवाडीको लेखन छ । फिल्मको छायांकन सुरुमा मेक्सिकोमा गरिने बताइएको थियो । तर त्यहाँ भिषा प्रक्रिया नमिलेपछि निर्माण पक्षले फिलिपिन्सलाई छायांकनस्थल बनाएको छ ।

यो फिल्मले चोरी बाटोबाट नेपालीहरु कसरी अमेरिका पुग्छन् । त्यसको भोगाई र यात्रालाई फिल्मले देखाउनेछ ।

फिल्ममा एक्सेस नेपाल फिल्मस् निर्माताको रुपमा रहेको छ भने सुनिल विष्ट गौली कार्यकारी निर्माताको रुपमा छन् ।  नेपाली, हिन्दी, अंग्रेजी र स्पेनिस भाषामा फिल्म निर्माण हुने निर्माण टिमले जनाएको छ ।

स्पेनिस भाषामा ‘कामिनो’ को अर्थ बाटो हुन्छ ।