कमेडी च्याम्पियनको जज बन्न लागेका हुन् सन्दिप ?

हालै विशाल भण्डारीले होस्ट गर्दै आएको हास्य–व्यंगमा आधारित टेलिभिजन रियालिटी शो ‘कमेडी क्लब विथ च्याम्पियन्स’ केही समयका लागि बन्द भएको छ । यो कमेडी शो बन्दसँगै विशाल ‘कमेडी च्याम्पियन सिजन ३’को तयारीमा जुटेका छन् । 

बिहीबारमात्र विशालले सामाजिक सञ्जाल फेसबुकमा अर्का कमेडियन सन्दिप क्षेत्रीसँगको एक तस्वीर राख्दै भविष्यको प्रोजेक्टका लागि छलफल गरिएको उल्लेख गरेका छन् । 

उनको यो तस्वीरले कतै उनीहरु ‘कमेडी च्याम्पियन सिजन ३’मा सहकार्य त गर्न लागेका होइनन् भन्ने चर्चा अहिले बजारमा छ । यसअघि यो शोमा प्रदीप भट्टराई, ऋचा शर्मा, सन्तोष पन्त र मनोज गजुरेलले जजको भूमिका निभाइसकेका छन् । 

यता सन्दिप भने आफ्नो चर्चित शो ‘ह्वाट द फ्लप’बन्द भएसँगै सन्दिपले अब के गर्छन् भन्ने चासो पनि उस्तै छ । यही परिप्रेक्ष्यमा विशाल र सन्दिपको भेटले कतै उनीहरु नयाँ सहकार्य गर्न लागेका त होइनन् भन्ने अनुमान लगाउन थालिएको छ ।

विशालले नयाँ शो शुरु गर्ने घोषणा गरेसँगै सन्दिपलाई जजको भूमिकामा निर्वाह गर्न दिन लागेका छन् भन्ने धेरैले अनुमान लगाइरहेका छन् । यस्तैमा विशाल भण्डारीले आफूले निर्देशन गर्न लागेको एक अनटाइटल प्रोजेक्टलाई पर धकेल्दै शोको तिब्र तयारीमा गरिरहँदा यही शोमा सन्दिप कतै जोडिएका त होइनन् । यस विषयमा विशाल र सन्दिपले आधिकारिक रुपमा केही भनेका छैनन् । दुवैले केही नभने पनि तस्वीरमा उनीहरुको खुलेको अनुहार देख्दा पक्कै सहकार्यको अन्तिम चरणमा छन् भन्ने प्रष्ट बुझ्न सकिन्छ ।